Ballina Bota Zelensky: Ukraina nuk do të përkulet para ultimatumeve ruse

Zelensky: Ukraina nuk do të përkulet para ultimatumeve ruse

“Ukraina nuk do t’i përkulet kurrë ultimatumeve nga Rusia dhe qytete të tilla si Kievi, Mariupoli apo Kharkiv nuk do të pranojnë pushtimin rus”.

Kjo ka qenë deklarata e presidenti ukrainas Voldymyr Zelensky për mediat.

“Ne kemi një ultimatum me pika në të – ‘ndiqe atë dhe pastaj do t’i japim fund luftës’. Ukraina nuk mund ta përmbushë ultimatumin”, theksoi Zelensky në një intervistë të publikuar nga kompania e transmetimit publik ukrainas “Suspilne”, cituar nga agjencia e lajmeve ndërkombëtare “Reuters”.

Rusia i kishte caktuar Ukrainës një afat të fundit të mëngjesit të sotëm për t’u dorëzuar në qytetin port të rrethuar të Mariupol-it, duke thënë se civilëve dhe luftëtarëve do t’u jepet një kalim i sigurt nga qyteti për sa kohë që ata të dorëzojnë armët.

Por Ukraina e injoroi atë ultimatum, duke thënë se dorëzimi nuk ishte një opsion.

Kujtojmë që kjo është dita e 26-të e luftimeve mes Rusisë dhe Ukrainës. Kjo e fundit ka bërë një rezistencë të lartë kundër trupave dhe bombardimeve ruse.

Sipas OKB-së, mbi 10 milionë njerëz janë larguar nga Ukraina dhe numri i ushtarëve rusë të vrarë nuk dihet ende – mendohet mbi 13 mijë.

Ndërsa nga shifrat vendase, rreth 2 mijë e 500 civilë mendohet se janë vrarë vetëm në Mariupol nga bombardimet ruse – mes tyre edhe fëmijë.

Ndërsa OKB-ja ka raportuar të paktën 816 njerëz të vrarë dhe 1 mijë e 333 të plagosur që nga fillimi i pushtimit rus në Ukrainë.

Artikulli paraprakMediat amerikane: Putini po arreston gjeneralët për dështimin në Kiev
Artikulli tjetërMinistri i Jashtëm i Francës: Na pret një krizë botërore ushqimi