Kryetari i Partisë Demokratike Shqiptare (PDSH), Menduh Thaçi, dje në Bruksel në kuadër të vizitës së tij dyditore në zyrat e Komisionit Evropian realizoi takim me Komisionarin për Politikat e Fqinjësisë dhe Zgjerim të Bashkimit Evropian, Johanes Hahn.
Në këtë takim u bisedua për zhvillimet politike në Maqedoni, për proceset integruese dhe hapjen e bisedimeve për anëtarësimin e Maqedonisë në Bashkimin Evropian.
Në takim kryetari Thaçi e vlerësoi si shumë pozitiv arritjen e marrëveshjes për kontestin e emrit me Greqinë që e hap rrugën e integrimit të vendit në strukturat Euro-atlantike dheqë do të ndihmojë në konsolidimin e paqes dhe stabilitetit në gjithë Ballkanin Perëndimor.
Kryetari Thaçi e informoi Komisionarin Han se Qeveria e re ku tani më merr pjesë aktive edhe PDSH po bën hapa drejt një angazhimi serioz në zbatimin e reformave, kthimit të sistemit frenim-balancim, përforcimit të demokracisë, si dhe sundimit të së drejtës.
Duke e vlerësuar këtë periudhë si shumë të rëndësishme për integrimet euro-atlantike të vendit, Kryetari Thaçi kërkoi mbështetje të plotë nga BE dhe hapjen e bisedimeve për anëtarësimin e Maqedonisë në BE, duke theksuar se hapja e kapitujve 23 dhe 24 do të jetë ndihmesë e madhe në reformat në gjyqësor dhe sigurinë në Maqedoni.
Kryetari Thaçi e falënderoi Komisionarin Han për bashkëpunimin dhe mbështetjen e vazhdueshme që Bashkimi Evropian ja jep Maqedonisë, si dhe e siguroi Komisionarin se PDSH do të jep përkrahjen e saj të plotë reformave dhe proceseve integruese të vendit.
