Jemi në prag të ndërrimit të moteve, me shpresa se 2019-ta do jetë një vit i mbarë për të gjithë. Viti me të cilin po ndahemi do mbahet mend për shumë ngjarje politike në Republikën e Maqedonisë, ngjarje këto, që me gjithë ambicjet drejt zhvillimeve të gjithanshme të shoqërisë, mbetën mes dëshirës dhe zhgënjimeve të mëdha. Turbulencat politike që e karakterizuan 2018-tën, do mbeten në mendjen e shqiptarëve të Maqedonisë si vit i shpresa e të thyera, edhe pse me votën shqiptare Qeveria e re vetëm sa i arriti qëllimet e veta. Ne si Aleancë për Shqiptarët i përkrahëm pa rezervë këto ndryshime, të bindur se me këtë përkrahje ishte e sigurtë rruga drejt strukturave Veri-Atllantike dhe hapja e Kushtetutës për ndryshime, si nevojë e realizimit të Marrëveshjes së Prespës me të cilën u ndërrua edhe emri i Shtetit.
I gjithë ky kontribut i vullnetit të mirë të shqiptarëve edhe pas ndryshimeve kushtetuese mbaroi pa përfilljen e amandamenteve të opzitës shqiptare. ,,falë”përkrahjes pa rezervë të BDI-së dhe disa partive të vogla shqiptare, si pjesë e koalicionit qeverisës, kërkesat e shqiptarëve të artikuluara përmes partive opozitare, si duket, do mbeten jashta agjendës së Qeverisë Zaev, si propozuese e ndryshimeve kushtetuese.
Viti që po e lëmë pas do mbahet mend si më skandalozi për shtetin e së drejtës. Blerja e lirisë e disa kriminelëve dhunues të 27 Prillit, 2017, deputetë të VMRO-së me votimimin për nismën e ndryshimeve kushtetuese, që përfundoi me Ligjin për amnesti, do mbeten njolla më e zezë e historisë më të re të këtij shteti.
Qytetarë të nderuar, miq e dashamirë të demokracisë liberale, ne mendojme se me forca të të përbashkëta politike të të gjitha partive , që me veprime racionale do veprojnë në të mirë të qytetarëve si të barabartë, viti i ri 2019 do sjellë mirëqenie politike, ekonomike dhe integrime në NATO e perspektivë që hap rrugë për në BE.
Viti që po e lëmë pas, për shqiptarët kaloi në atmosferë të dy Jubileve, 550 vjetorit të vdekja e Skenderbeut dhe 50 vjetorit të Demonstratave të Tetovës , të vitit 1968.
Urime dhe Gëzuar viti 2019, me shpresë për një jetë më të dinjitetshme për të gjithë qytetarët e Republikës!
Aleanca për Shqiptarët
