U largua nga shtëpia një ditë më parë, 12-vjeçari shqiptar gjendet pa shenja jete në lumë!

Ditën e djeshme familja e denoncoi të humbur 12-vjeçarin nga fshati Dragobi i Tropojës.

Djaloshi me inicialet J.D. kishte shkuar për të peshkuar në lumin Valbonë, por nuk është kthyer më në banesë.

Pas kërkimeve, trupi i tij u gjet sot i pajetë në shtratin e lumit Valbonë, në vendin e quajtur “Ura e Dragobisë”.

“Më datë 12.05.2019, pasdite, kanë njoftuar familjarët se fëmija i tyre me inicialet J.D., vjeç 12, banues në fshatin Dragobi, ka shkuar për të zënë peshk rreth 200 m larg banesës së tyre, në lumin Valbona, dhe nuk është kthyer më.

Forcat e Policisë të Komisariatit të Policisë Tropojë së bashku me familjarët dhe banorët e fshatit, kanë vijuar kërkimet për gjetjen e tij, ku sot në orët e para të mëngjesit është bërë e mundur gjetja e trupit të pajetë të të miturit, në shtratin e lumit Valbonë, në vendin e quajtur “Ura e Dragobisë”.

Nga veprimet e para hetimore dyshohet se ai aksidentalisht ka rënë në lumë, ku për pasojë ka humbur jetën”, njofton policia.

Materialet iu referuan organeve kompetente për hetime të mëtejshme, për ngjarjen aksidentale.