MIRË SE VJEN NË LËVIZJEN BESA PROFESORESHË FLORIJE MIFTARI
Prof. Florije Miftari njëherit do të jetë Drejtoreshë e Departamentit të Vetëqeverisjes Lokale pranë Lëvizjes BESA!
Biografia
Florije Miftari është profesoreshë e shkencave ekonomike. Studimet bazike i ka mbaruar në fakultetin Ekonomik, Universiteti i Prishtinës, ndërsa studimet master i ka përfunduar në fakultetin Ekonomik, drejtimi Ekonomi Monetare në Universitetin “Kirili dhe Metodi” në Shkup. Ka doktoruar në fushën e ekonomisë në Universitetin e Prishtinës me temë “Decentralizimi fiskal dhe zhvillimi ekonomik lokal”.
Florije Miftari ka një karrierë të pasur profesionale dhe akademike, në periudhën 1990-1996 ka punuar në sektorin privat si menaxhere financiare. Prej vitit 1997-2010, ka punuar në komunën e Tetovës, fillimisht si këshilltare për zhvillim ekonomik, e më pas si udhëheqëse e sektorit për buxhet dhe financa. Ka marrë pjesë në mënyrë aktive në procesin e decentralizimit fiskal në Republikën e Maqedonisë së Veriut, ku në kuadër të projektit “Make Decentralization Work” organizuar nga World Learning, USAID, BNJVL, ka mbajtur trajnime për kryetarë të komunave dhe këshilltarët. Poashtu, në kuadër të projektit “Mbështetja e procesit të decentralizimit”, ka dhënë trajnime në vend të punës për të punësuarit në departamentet e financave dhe tatimeve në disa komuna të Maqedonisë Veriperndimore.
Karrierën akademike e ka filluar që nga viti 2009-2010 si ligjëruese visiting në Universitetin e Tetovës. Nga viti 2010- 2017 është profesoreshë e rregullt në Universitetin e parë privat FON në Shkup. Poshtu, në vitin 2011-2012 angazhohet si profesoreshë viziting në Universitetin e Evropës Juglindore në Tetovë në nivelin master. Duke filluar që nga viti 2013 e aktualisht, është profesoreshë në Kolegjin AAB në Prishtinë, fillimisht si profesoreshë viziting e më vonë edhe e rregullt.
Prof. Florije Miftari është autore e një libri, ka të publikuara shumë punime shkencore e profesionale, ka marrë pjesë në shumë konferenca shkencore vendore e ndërkombëtare.
