Aktorja e njohur e Teatrit të Shkupit, Silvana Bajçinovci, ndërroi jetë sot, ndërsa do të ngelet në kujtimet e atyre që e kanë parë të luaj në skenën e teatrit. Lajmin për ndarjen nga jeta e ka kumtuar edhe teatri amë, njofton Portalb.mk
Largimi i artistëve nga kjo botë ngjall trishtim, aq më pak që para dy javësh Portalb.mk publikoi një përkujtesë për të. Me shumë keqardhje sot po publikojmë kumtin e zi. Silvana do t’i përkas skenës përjetësisht! Edhe një herë përkujtojmë se kush ka qenë Silvana Bajçinovci.
E lindur në Stari tërg të Mitrovicës, në vitin 1955 ku e ka kryer shkollën fillore dhe të mesme. Qysh si e vogël ka treguar prirje dhe talent për artin skenik dhe ka marrë pjesë në shfaqje të nxënësve dhe në manifestime të ndryshme kulturore duke qenë gjithnjë në qendër të vëmendjes së publikut. Në Teatrin e Kombësive në Shkup sot Teatri Shqiptar ka ardhur në cilësinë e aktores profesioniste në vitin 1975. Ka luajtur mbi 80 role ndër të cilat mbi 30 role kryesore.
Deri në fundin e viteve të 80-ta ka qenë yll i Teatrit të Kombësive kur pas tragjedive të rënda familjare është tërhequr dhe ka luajtur kohë pas kohe.
Ndër rolet kryesore më të cilat ka mbetur në kujtesë të paharrueshme dhe në kujtesën historike të shënuar në monografitë e skenës teatrore janë: Sanija te ‘’Bashkëshortët ‘‘ e Muharrem Qenës, Antigona në tragjedinë ‘’Antigona’’ të Sofokliut, Fatimja e bukur në shfaqjen ‘’Zbutësit e njerëzve me sy zymyridi’’ të Teki Dervishit, ‘’Nita’’ në shfaqjen e Josip Relës, ‘’Berta’’ në shfaqjen ‘’Anija e vjetër’’ e Reusl Shabanit, Kafsha në shfaqjen ‘’Pahintikë në ëndërr’’ të Xhabir Ahmetit, E fejuara në shfaqjen ‘’Mblesëria’’ të Çehovit si dhe shumë role tjera për të cilat nëse keni qenë dëshmitarë, ftoheni ta pasurojmë biografinë e kësaj aktoreje me qëllimin që kur të kërkohet emri i saj në ‘’google’’ të shfaqen të paktën disa rreshta për të.
Silvana Bajçinovcin kritika e cilësonte si aktore të sofistikuar në të gjitha elementet e artit teatror. Si për nga loja, gjesti, aftësia e transformimit, për nga mënyra e artikulimit të fjalës artistike , zëri melodik, krijimi i raporteve me partnerët dhe impaktit me publikun lë mbresa të jashtëzakonshme. Ka qenë njëra ndër aktoret që ka lënë gjurmë në artin skenik të Maqedonisë dhe të hapësirave të ish- Jugosllavisë. Për punën e suksesshme ka marrë çmime të nivelit jugosllavë dhe republikan. Është nga aktoret e para që në atë kohë kur e kërkonte roli shfaqej’’ topless’’.
Teatri Shqiptar i Shkupit shkruan:
Për të bukurën Silvanë jeta nuk qe fare e lehtë. Sot i mbylli sytë përjetësisht, në moshën 69 vjeçare në Shkup. Qoftë i përjetshëm kujtimi për të!
