Një krim i rëndë në një familje në lagjen “Dardania” të Prishtinës u regjistrua paraditen e sotme. Një kryefamiljar vrau me armë zjarri bashkëshorten, nusen e djalit dhe më pas qëlloi edhe veten për vdekje.
Mediat kosovare kanë zbuluar identitetin e viktimave dhe babait-vrasës, i cili pasi i mori jetën bashkëshortes së tij dhe nuses së shtëpisë, telefonoi të birin për t’i thënë: “Ta kom vra grunë edhe nanën, tash po e vras veten”.
Autori i krimit të rëndë është Hasan Krasniqi. Ai ekzekutoi gruan Hysnije dhe nusen e djalit Remzien. Çuditërisht në fotot e publikuara nga mediat kosovare, familja Krasniqi shihet e bashkuar.
Por, sipas fqinjve të tyre, familja Krasniqi ka pasur probleme të vazhdueshme, ndërsa Hasani që kreu vrasjet dyshohet se kishte probleme psikike.
“Këta kanë pas probleme të vazhdueshme familjare, dhunë në familje, dhe çrregullime mendore”, thuhet në një deklaratë konfidenciale të Prokurorisë.
Zëdhënësi i Policisë së Kosovës, Baki Kelani, ka folur nga vendi i ngjarjes ku ka treguar edhe detajet të cilat policia i ka siguruar nga informacionet e para.
“Ekipet mjekësore, mjekësia ligjore dhe të gjitha njësitë përkatëse janë në vendin e ngjarjes. Fillimisht nga informacionet që posedojmë deri më tani bëhet fjalë për një vrasje që është cilësuar vrasje e dyshimtë, një person të gjinisë mashkullore të vitit të lindjes 1958, një grua të vitit të lindjes 1959 dhe një grua tjetër të vitit të lindjes 1991”, ka thënë Kelani.
Kelani ka shtuar se nga informacionet e para bëhet e ditur se fillimisht i dyshuari ka vrarë gruan e tij, më pas nusen e djalit dhe në fund ka bërë vetëvrasje.
