Bilall Kasami: Ata që për 20 vjet u ulën mbi shpinën e shqiptarëve, që ndanë shtetin si plaçkë dhe u pasuruan si pashallarë, sot bërtasin sikur janë viktima

Nga Bilall Kasami

Partia e milionerëve ka dalë krejt prej binarëve. Ata që për 20 vjet u ulën mbi shpinën e shqiptarëve, që ndanë shtetin si plaçkë dhe u pasuruan si pashallarë, sot bërtasin sikur janë viktima. Kanë humbur kontaktin me realitetin. Jetojnë në botën e tyre, me makina të shtrenjta, me vila e miliona në xhep dhe tani po bëjnë moral për shqiptarët!

Po kush i ha më këto përralla, o Ali?

Thuaju struganëve! Sa mori dhëndri yt nga biznesi me mazut? Sa miliona hynë në xhepat tuaj nga ai pazar? Sa fitove ti, e sa iu ndave të tjerëve që të mbajtën në pushtet?

Mos e luaj rolin e të përvuajturit, se të gjithë e dinë se nuk po të djeg për shqiptarët, por për dhëndrin. Po bën zhurmë që ta shpëtosh dhëndrin nga burgu, kjo është e vërteta!
Sa herë që drejtësia afrohet, nis cirku! Fillojnë fjalimet, dalin deklaratat, madje kërkoni edhe veting. Po 22 vjet ishe në pushtet, o Ali!

Ti dhe partia jote u pasuruat duke i trajtuar shqiptarët si mjet për pasurinë tuaj. Ndaj sot, kur nuk iu ecën më, filloni me shpifje e viktimizime.

Shqiptarët janë zgjuar. Nuk tremben më nga “tërmetet” që i shpik për të mbuluar panikun tënd.

Koha jote ka kaluar. Koha e shqiptarëve ka nisur. Dhe ajo s’kthehet më pas.