Themeluesi dhe shefi ekzekutiv i Facebookut, Mark Zuckerberg po përballet me thirrje gjithnjë e më të shpeshta, që të paraqitet personalisht në panelet e hetimeve për sjelljen e rrjetit të tij social.
Kompania është akuzuar se nuk i informoi përdoruesit, pasi informacionet e profileve të tyre ishin marrë dhe mbajtur nga “Cambridge Analitica”, një firmë të dhënash që ndihmoi Donald Trumpin të fitojë zgjedhjet.
Të premten, Facebook tha se kishte bllokuar qasjen e firmës britanike në platformën sociale, pasi kompania londineze nuk i kishte fshirë të dhënat e përdoruesve të marra në mënyrë të gabuar, siç kishte premtuar.
Megjithëse premtoi se në vitin 2018 do ta riparonte Facebookun, themeluesi i kompanisë Zuckerberg ia ka dalë të shmangë përballjen me numrin në rritje të kritikëve dhe ka dërguar avokatë apo shefa politikash në seancat e ndryshme dëgjimore.
Debati për përdorimin e të dhënave të Facebookut për propagandë të shënjestruar politike ka bërë që shumë figura politike, nga të dyja anët e Atlantikut, të nxisin Zuckerbergun të dalë publikisht e të mbrojë, ose të paktën justifikojë, krijimin e tij, shkruan tch.
Senatorë amerikanë dhe deputetë britanikë i bënë thirrje Zuckerbergut të paraqitet në komisionet hetimore, madje ka nga ata që thonë se do t’i dërgojnë edhe thirrje.
Facebook dhe “Cambrige Analitica” nuk pranojnë faj për situatën e fundit, por analistët thonë se kritikat e fundit shkojnë drejt modelit të Facebookut për të bërë biznes.
