Një diplomat i rritur në Bellingham u emërua së fundmi nga administrata e Biden për të shërbyer si ambasador i SHBA-së në Kosovë. Presidenti Joe Biden emëroi Hovenierin në korrik dhe ai u konfirmua unanimisht nga Senati i ShBA-së më 18 nëntor dhe kjo është hera e parë që Hovenier shërben si ambasador i ShBA-së, transmeton Klan Kosova.
“Kosova do të jetë vendi im i 10-të”, tha Jeff Hovenier.
Hovenier kaloi pjesën më të madhe të fëmijërisë së tij në Bellingham dhe shumë nga anëtarët e familjes së tij ende jetojnë në Ëhatcom County. Hovenier u transferua në Bellingham kur ishte në kopsht fëmijësh, pasi babai i tij mori një punë si profesor në Universitetin e Uashingtonit Perëndimor.
Hovenier ndoqi mësimet në shkollë publike në Bellingham, ku edhe diplomoi në shkollën e mesme në 1983. Hovenier u diplomua në bachelor në Universitetin Brigham Young dhe pastaj përfundoi edhe studimet master në Universitetin e Georgetoën përpara se të fillonte karrierën e tij prej më shumë se tre dekadash si diplomat.
Pjesa më e madhe e karrierës së tij është fokusuar në çështjet e sigurisë në Evropë dhe Euroazi. Përpara se të emërohej në rolin e tij të ri si ambasador, Hovenier shërbeu si zëvendës shef i misionit në Ambasadën e ShBA-së në Ankara, Turqi.
Përveç Kosovës dhe Turqisë, Hovenier ka shërbyer edhe në Gjermani, Kroaci, Greqi, Panama, Paraguaj, Peru, Serbi dhe Mal të Zi. Ai flet gjermanisht, greqisht, kroatisht dhe spanjisht dhe ka marrë çmime të shumta, duke përfshirë disa nga qeveria e Republikës së Kosovës.
Hovenier luajti një rol në negociatat që përfundimisht çuan në shpalljen e pavarësisë së Kosovës nga Serbia në vitin 2008.
“Ne kemi investuar shumë në Ballkan. Është në interesin e ShBA-së që Kosova të bëhet një vend i qëndrueshëm, i prosperuar demokratik, gjë që po bëhet”, ka thënë ai.
Ai po punon me një kurator për të përzgjedhur artin që do të varet në shtëpinë e tij në Kosovë dhe në Ambasadën e ShBA-së, ku do të argëtojë liderë të huaj. Hovenier po zgjedh artin që pasqyron frymën e Paqësorit veriperëndimor, ai veçanërisht shpreson të shfaqë vepra nga artistë indigjenë.
