Kryeministri grek Kyriakos Mitsotakis e ka nisur fjalën e tij në mbledhjen e Këshillit të Ministrave duke u kërkuar falje qytetarëve, të cilët mbetën të bllokuar me orë të tëra në autostradën Attiki Odos, për shkak të reshjeve të borës.
Ai siguroi se përgjegjësitë do të caktohen duke pranuar dështimet dhe mangësitë, falënderoi drejtuesit e Shtetit dhe Forcave të Armatosura për përpjekjet mbinjerëzore që bënë dhe përfundoi duke thënë “Mësojmë dhe ecim përpara”.
Kyriakos Mitsotakis e përshkroi si “menaxhimi i pasuksesshëm i stuhisë së borës”. “ Gjërat nuk shkuan mirë dhe ne duhet të rregullojmë planet tona”, tha kryeministri.
“Dua të filloj duke kërkuar falje personale dhe të sinqertë nga bashkëqytetarët tanë që vuajtën për shumë orë duke u bllokuar në Attiki Odos.
Janë shumë të qarta përgjegjësitë ndaj koncesionarit për mënyrën se si u përball me këtë stuhi të fundit. Këto do të hetohen plotësisht në bazë të legjislacionit ekzistues, por edhe të kushteve të përfshira në kontratat përkatëse me shtetin.
Por problemet, le të jemi të sinqertë, nuk ekzistonin vetëm në Attiki Odos. Kishte edhe në rrugët kryesore. Është e qartë se edhe atje gjërat nuk kanë shkuar mirë dhe duhet të shikojmë shkaqet që kanë çuar në këtë situatë dhe të rregullojmë planet tona.
Është e qartë dhe nëse duhet të nxjerrim një mësim nga menaxhimi i pasuksesshëm i kësaj stuhie bore është fakti se në kohë krize, qendrat, drejtuesit e të gjitha këtyre strukturave, duhet të jenë bashkë, të vendosin dhe të veprojnë menjëherë së bashku”, derklaroi kryeministri grek. g.v/abcnews.al
