Një nënë siriane dhe foshnja e saj e porsalindur gjenden në spital pasi u shpëtuan nga rrënojat e shtëpisë së goditur nga tërmeti 2 herë këtë javë.
Dima ishte 7 muajsh shtatzënë kur tërmeti i së hënës së kaluar bëri që një pjesë e shtëpisë së saj në Jidayris të rrëzohej.
Ajo pësoi lëndime të lehta dhe më vonë lindi një djalë, Adnan, në një spital në Afrin të mbështetur nga Shoqëria Mjekësore Siriane Amerikane (Sams).
Ata u kthyen në shtëpi, vetëm se ajo u shemb plotësisht 3 ditë më vonë.
Adnan u kthye në spitalin al-Shifa të Afrinit nga ekipet e shpëtimit në një gjendje kritike, duke vuajtur nga dehidratimi i rëndë dhe verdhëza, ndërsa Dima u trajtua për një dëmtim të rëndë të gjymtyrëve të poshtme.
Dr Abdulkarim Hussein al-Ibrahim, një pediatër, i tha BBC-së përmes rrjetit WhatsApp të hënën se foshnja po i përgjigjej mirë trajtimit.
“Gjendja e Adnanit… është përmirësuar dukshëm,” tha ai. “Ne thjesht po e ushqejmë atë dhe po [sigurojmë] pjesën tjetër të nevojave të tij përmes pikave intravenoze.”
Pamjet video të publikuara nga Sams treguan Adnanin duke fjetur i qetë brenda një inkubatori.
Dima ka dalë sërish nga spitali dhe po jeton në një tendë së bashku me bashkëshortin e saj, Abdul Majid, dhe 9 mbesat dhe nipërit e tyre. Ajo ka udhëtuar për në Afrin për të vizituar Adnanin në spital çdo ditë.
Familja e saj u detyrua të kthehej në shtëpinë e saj pjesërisht të shkatërruar pasi ajo lindi, sepse nuk kishte një strehë alternative në dispozicion në Jidayris, një nga qytetet më të goditura në Sirinë veriperëndimore të kontrolluar nga opozita.
Ata gjithashtu nuk kanë marrë asnjë ndihmë tjetër që nga tërmeti, si dhjetëra mijëra të tjerë që janë prekur.
Edhe para katastrofës, 4.1 milionë njerëz – shumica prej tyre gra dhe fëmijë – mbështeteshin në ndihmën humanitare për të mbijetuar në rajon, i cili është bastioni i fundit i xhihadistëve dhe rebelëve që kanë luftuar forcat e Presidentit Bashar al-Assad që prej 12 vitesh tashmë.
