Gazetari Leonidha Musai ka zbuluar detaje të reja rreth sekuestrimit të mbi 13 kilogramë lëndë narkotike e llojit heroine në portin e Durrësit. Sasia e lëndës narkotike ishte ndarë në 26 pako, ndërsa ishte fshehur në pjesën e pasme të një autobusi të linjës Durrës-Milano.
Sipas gazetarit, kanë qene autoritetet italiane, ato që i kanë dhënë informacion autoriteteve shqiptare.
“Policia e Durrësit ka marrë informacion nga Policia e Shtetit dhe e ka mbajtur në hetim këtë linjë, e cila ka rreth 3-4 autobus, që e bëjnë rrugën gjithmonë drejt Italisë. Autoritet italiane kanë dhënë informacion për autoritet shqiptare që kjo linjë autobusash shërbente për trafikimin e lëndëve narkotike”, tha ai.
Më tej, ka theksuar se policia ka përgjime që pronari i linjës së autobusëve, shtetasi Mikel Pici ka komunikuar me shoferët e autobusave.
“Policia ka përgjime që pronari i linjës ka komunikuar me shoferët e autobusët. Do të zbardhen këto tabulate dhe do të zbulohen edhe persona të tjerë”./abcnews.al
https://youtu.be/YALR5aSYcv4
Port, Durrës – Vijojnë goditjet e njëpasnjëshme ndaj tentativave për trafikim të drogave të forta.
Finalizohet operacioni policor i koduar “Terminali”, i zhvilluar nga Policia Kufitare e portit të Durrësit, në bashkëpunim me specialistët për Hetimin e Trafiqeve të Paligjshme dhe Narkotikëve të DVP Durrës, dhe autoritetet doganore të portit.
Falë kontrolleve të shtuara të Policisë Kufitare dhe me mbështetjen e inteligjencës informative, parandalohet dhe goditet një tjetër rast i tentativës për trafikim të drogave të forta drejt Italisë.
Gjenden të fshehura në një autobus dhe sekuestrohen në cilësinë e provës materiale, 26 pako me lëndë narkotike heroinë, me peshë totale 13 kilogramë e 750 gramë.
Vihen në pranga pronari i firmës së linjës së autobusëve dhe drejtuesi i autobusit ku u gjet lënda narkotike.
Shërbimet e Policisë Kufitare, në vazhdën e operacioneve të njëpasnjëshme për parandalimin, evidentimin dhe goditjen e tentativave për trafiqe të paligjshme, si rezultat i intensifikimit të kontrollit, bazuar dhe në analizën e riskut dhe në inteligjencën informative, kanë kaluar për kontroll të detajuar në vjën e dytë, autobusin e linjës “Durrës-Milano”.
Nga kontrolli i imtësishëm, në bashkëpunim me specialistët për Hetimin e Trafiqeve të Paligjshme dhe Narkotikëve të DVP Durrës, dhe autoritetet doganore, duke përdorur edhe teknikat bashkëkohore të kontrollit, shërbimet e Policisë kanë gjetur të fshehura në pjesën e pasme të autobusit, 26 pako të mbështjella me natriban, brenda të cilave kishte lëndë narkotike të dyshuar heroinë me peshë totale 13 kilogramë e 750 gramë, e cila u sekuestrua në cilësinë e provës materiale.
Në vijim të veprimeve të para hetimore, specialistët për Hetimin e Trafiqeve të Paligjshme dhe Narkotikëve të DVP Durrës kanë arrestuar në flagrancë shtetasit:
-M. P., 32 vjeç, banues në Rrogozhinë, pronari i firmës së linjës së autobusëve “Durrës-Milano”;
-P. R., 57 vjeç, banues në Fier, drejtuesi i autobusit ku u gjet lënda narkotike.
Gjatë kontrollit fizik, shtetasit M. P. iu gjet një dozë lënde narkotike kokainë.
Gjithashtu, në cilësinë e provës materiale u sekuestruan edhe 8 celularë.
Ndërkohë, strukturat hetimore të DVP Durrës, në bashkëpunim me Prokurorinë, vijojnë punën për zbardhjen e plotë të këtij rasti, për identifikimin dhe arrestimin e shtetasve të tjerë të implikuar në këtë rast.
Materialet procedurale i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme, për veprën penale “Trafikimi i lëndëve narkotike”, kryer në bashkëpunim dhe “Prodhimi dhe shitja e narkotikëve”.
