Një studim i fundit në Mbretërinë e Bashkuar ka zbuluar se rreth një në pesë adoleshentë janë në rrezik të problemeve të rëndësishme psikologjike për shkak të përdorimit të tepërt të smartfonëve. Ekspertët nga King’s College në Londër e identifikuan këtë fenomen si “përdorim problematik të smartfonëve” (PSU), që lidhet ngushtë me rritjen e simptomave të ankthit, depresionit dhe pagjumësisë.
Studimi i parë, që përfshiu 657 adoleshentë të moshës 16-18 vjeç në Londër dhe rajone të tjera të Anglisë, zbuloi se 19% e tyre kishin PSU. Ata që përjetonin PSU ishin dy herë më të rrezikuar të kishin simptoma ankthi dhe tri herë më shumë gjasa të shfaqnin simptoma depresioni. Një analizë tjetër e kryer në Londër te 62 adoleshentë të moshës 13-16 vjeç konfirmoi se PSU ishte e lidhur me rritjen e ankthit dhe depresionit, si dhe me probleme të gjumit.
Ekspertët sugjerojnë disa strategji për të menaxhuar përdorimin e smartfonëve, përfshirë fikjen e njoftimeve, mbajtjen e telefonave jashtë dhomës së gjumit dhe përdorimin e modaliteteve “Mos shqetëso”. Studimi thekson rëndësinë e diskutimit të kufijve dhe mënyrave për të menaxhuar përdorimin e teknologjisë me adoleshentët për të parandaluar ndikimet negative në shëndetin e tyre mendor.
