I pyetur per ligjin e përdorimit të gjuhëve, kryeministri i Maqedonisë së Veriut Hristian Mickoski, u shpreh se do ta zbatojë atë dhe Kushtetutën pavarësisht mospajtimeve me të.
“Ndoshta edhe mua më paraqet problem diçka që është bërë në të kaluarën me Kushtetutën, dhe sado që të mos pajtohem dhe të jem kundër, siç është përdorimi i mbiemrit “E Veriut”, unë derisa ta ushtroj këtë funksion do të qëndroj para kësaj shenje, sepse nuk dua që në këtë mënyrë ta lëndoj Kushtetutën e Maqedonisë dhe Ligjet e Maqedonisë”, tha Mickoski.
Mickosi hodhi poshtë mundësitë për destabizlimin e vendit.
“Nuk besoj se do të ketë mundësi për destabilizim… Unë jam person që i respektoj ligjet dhe Kushtetutën dhe nuk pres që kushdo qoftë që merr pagë në kurriz të qytetarëve këtu te ne, të mos i respektojë ligjet e Maqedonisë dhe Kushtetutën e Maqedonisë”, tha ai.
Ndërkohë Gjykata Kushtetuese ka deklaruar se këtë muaj do të duhet të marrë një vendim rreth iniciativës që është dorëzuar për vlerësimin e kushtetueshmërisë së ligjit për përdorimin e gjuhëve.
Në vitin 2018 Kuvendi i Maqedonisë së Veriut miratoi këtë ligj për përdorimin e gjuhëve të bashkësive etnike, çka solli avancimin e përdorimit zyrtar të gjuhës shqipe në të gjitha organet e pushtetit qendror.
Ligji u miratua në atë kohë me 69 vota ndërsa në seancë nuk morën pjesë deputetët e opozitës maqedonase të asaj kohe të udhëhequr nga VMRO DPMNE e cila ligjin e cilëson antikushtetues. Po ashtu edhe president i asaj kohe Ivanov nuk e firmosi ligjin./vizionplus.tv
