Tragjedi në Vollkovë të Shkupit – qiramarrësi vret pronarin, plagos djalin e më pas i merr jetën vetes! (VIDEO)

E hënë e përgjakshme në Volkovë të Shkupit. Një qiramarrës vrau pronarin e shtëpisë ku jetonte dhe qëlloi djalin e tij të mitur, më pas u vetëvra.

-Vrasja me dy viktima ka ndodhur në rrugën 25 në Volkovë në ora 9 të mëngjesit të sotëm.

-Sot (24.03.2025), rreth orës 09.00, në policinë e Shkupit është raportuar se në fshatin Vollkovë të rajonit të Shkupit ka pasur të shtëna me armë zjarri në të cilën janë përfshirë disa persona. Në vendngjarje kanë mbërritur efektivët e policisë dhe kanë konstatuar se personat me inicialet R.C. dhe M.N. nga plagët e marra kishin vdekur në vendin e ngjarjes. Një mjek i urgjencës konstatoi vdekjen e tyre. I lënduar ka mbetur edhe një i mitur, i cili është transportuar për mjekim në Kompleksin e Klinikave “Nënë Tereza”. Si autor i mundshëm i ngjarjes dyshohet personi me inicialet M.N. Po merren masa për zbardhjen e rastit.

Policia bën me dije se vdekjen e dy personave e ka konfirmuar në vendngjarje ekipi i Shërbimit Mjekësor të Urgjencës. I mituri i plagosur, djali i pronarit të vdekur të shtëpisë është transportuar në klinikat e Shkupit dhe ndodhet në gjendje stabile. Për momentin nuk ka të dhëna për shkakun e kësaj ngjarjeje tragjike.

Paradite në vendngjarje është vërejtur një autoambulancë, si dhe një prani e shtuar e ekipeve policore që po kryenin kontrollin dhe grumbullonin informacione lidhur me ndriçimin e rastit dhe motiveve të vrasjes. Disa nga fqinjët, të cilët nuk kanë dashur të flasin para kamerës, kanë thënë se mes dy njerëzve, tashmë të ndjerë, nuk ka pasur asnjë debat të mëparshëm dhe janë habitur që në lagjen e tyre të qetë ka ndodhur një ngjarje kaq e përgjakshme. Nga Prokuroria bëjnë me dije se të dy trupat do të dërgohen për autopsi, ndërsa do të kryhen ekspertiza shtesë për të përcaktuar të gjitha rrethanat e ngjarjes tragjike. Gjithashtu do të ekzaminohet edhe arma e përdorur në këtë rast.

-Prokurori publik, policia dhe grupet e tjera hetimore po kryejnë këqyrje në vendngjarje dhe po ndërmarrin të gjitha veprimet për zbardhjen e ngjarjes. Është dhënë urdhër për autopsi të trupave të dy të ndjerëve. Arma është marrë nga vendi i ngjarjes dhe do t’i nënshtrohet ekspertizës mjeko-ligjore. – Prokuroria Publike

Ky është sherri i dytë ku përdoret arma në Shkup në 4 ditët e fundit. Të enjten një person ka mbetur i plagosur nga një shkëmbim zjarri në hyrje të fshatit Moranë./Kanal 5/ TetovaNews