Komuna e Tetovës sot organizon debat publik për nismën e ndryshimit të emrave të rrugëve. Por, për këtë ka reaguar sërish ashpër Lidhja e Luftëtarëve të Luftës Nacionalçlirimtare dhe Antifashiste nga Tetova. (LNÇ). Ata thonë se ky i ashtuquajtur debat publik është vetëm një farsë, se emrat e rrugëve tashmë janë vendosur në kabinetin e kryetarit të komunës dhe për këtë arsye duhet bojkotuar, shkruan Portalb.mk.
Sot (4 prill), në ora 15:00, Komuna e Tetovës organizon debatin e parë publik për Propozimin e Emrave të Rrugëve.
“Ftojmë të gjithë qytetarët, shoqatat, organizatat jo qeveritare, sektorin civil që të marrin pjesë në këtë debat publik për emërimin e rrugëve”, thonë nga Komuna e Tetovës.
Ata thonë se çdo propozim i qytetarëve është i rëndësishëm dhe ndihmon që ky proces të jetë gjithëpërfshirës dhe i suksesshëm për qytetarët dhe qytetin e Tetovës!
Lidhja e Luftëtarëve të LNÇ-së bëri apel që debati i nesërm të bojkotohet.
“U bëjmë apel qytetarëve, partive politike, shoqatave qytetare, klubeve dhe të gjitha formave të tjera të bashkimit shoqëror që të bojkotojnë procesin e rremë, të pandershëm dhe të rrezikshëm të ndryshimit të emrave të rrugëve në qytetin e Tetovës, të iniciuar dhe të udhëhequr nga Kryetari i Bashkisë, Bilall Kasami”, thuhet në deklaratën e sotme të Unionit.
LNÇ-ja e paralajmëroi Kasamin më 25 janar se ndryshimi i paralajmëruar i emrave të rrugëve mund të hapë kutinë e Pandorës dhe të çojë në intolerancë ndëretnike.
Në janar 2025 Lidhja e Luftëtarëve të LNÇ-së dorëzoi nismë për vlerësimin e kushtetutshmërisë së riemërimit të rrugëve në Tetovë.
Ata thonë se presin që këshilltarët e nacionalitetit maqedonas, të cilët formojnë shumicën e nevojshme të cilësuar për të marrë vendimin për ndryshimin e emrit të një rruge dhe që ende nuk janë tërhequr nga procesi, të tërhiqen menjëherë dhe pa vonesë publikisht dhe procesi të bie poshtë.
Kujtojmë se këshilltarët komunal të LSDM-së janë tërhequr tërësisht nga çdo strukturë dhe organ në komunë që është duke punuar në procedurën për ndryshimin e emrave të rrugëve.
Thirrja publike për riemërimin e rrugëve në Komunën e Tetovës ishte e hapur deri më 10 mars, ku qytetarët mund të jepnin propozimet e tyre.
Nisma e ndryshimit të emrave edhe në të kaluarën ka ngjallur debat dhe tensione politike.
Aktualisht sipas të dhënave nga Komuna e Tetovës, është konstatuar që në Tetovë janë gjithsej 265 rrugë, prej të cilave 111 janë me emra, 113 me numra dhe 41 nuk kanë aspak emërim.
Grupi punues për riemërimin e rrugëve në Komunën e Tetovës u themelua më 26 gusht 2024,
Ky grup punues përbëhet nga këshilltarët komunal: Argjend Veliu (LB), Abdyrahim Maksuti (LB), Veton Murati (BDI), Anita Boshkovska Jovanovska (VMRO-DPMNE), Visar Palloshi (PDSH), Faton Selami (AAA) dhe Gligorije Stojanovski (LSDM), i cili tani më është tërhequr.
Anëtarë të tjerë janë: Shaban Xhelili nga Sektori për Veprimtari Komunale, Nuhi Pajaziti nga Sektori për Planifikim Urbanistik, historiania Olivera Gixhevska dhe profesori Arsim Sinani.
Grupi i punës ka për detyrë të përpilojë propozim listë të rrugëve dhe ta dorëzojë te këshilli komunal, i cili më pas nëse e miraton, procesi do të vijojë në institucionet përkatëse.
Në këtë vendim nuk është i përfshirë ndryshimi i emrave të shkollave dhe institucioneve publike, ashtu siç u promovua në vitin 2022 përmes nismës për ndryshimin e emrave të rrugëve, shkollave dhe institucioneve publike në Tetovë nga Shoqata Akademike e Shqiptarëve për Art dhe Shkencë dhe Komunës së Tetovës.
Në Tetovë edhe pse disa rrugë janë emëruar në gjuhën shqipe, të njëjtat shfrytëzohen vetëm nga Komuna e Tetovës gjatë komunikimit me qytetarët kurse në dokumente zyrtare vazhdojnë të qëndrojnë emrat nga koha e ish Jugosllavisë.
Edhe më herët në Tetovë ka pasur nisma të tilla që nuk kanë shkuar deri në fund.
