President i SHBA-ve Donald Trump ka vendosur të tjera tarifa për të gjitha mallrat qe hyjnë në SHBA.
Pavarësisht se vendimi i tij parashikon një taksë bazë prej 10% për të gjitha importet, do të ketë ndryshime për 60 vende të cilat Shtëpia e Bardhë i ka cilësuar si shkelësit më të mëdhenj.
Ndaj mallrave të importuara nga vendi ynë dhe Kosova, kreu i Shtëpisë së Bardhë vendosi një taksë prej 10%.
Sakaq ndaj atyre nga Serbia 37%, Bosnja Hercegovina 35% dhe Maqedonia e Veriut 33%.
Duke folur në Shtëpinë e Bardhë, Trump tha se ndaj importeve nga Kina do vendoset tarifë prej 34 për qind, ndaj atyre nga Bashkimi Evropian 20 për qind, Korea e Jugut 25 për qind dhe Japonia 24 për qind.
“Bashkimi Evropian, ata janë tregtarë shumë të ashpër. Ju mendoni për bashkimin Evropian se janë shumë miqësorë. Ata na shqyejnë. Është shumë e trishtueshme ta shohësh. Pra, nëse e shikoni këtë kolonë, Kina 67 për qind. Këto janë tarifat që i ngarkohen SHBA-së, duke përfshirë manipulimin e monedhës dhe barrierat tregtare. Kështu që ne do të vendosim një tarifë prej 34 për qind”, tha Trump.
Trump shpalli emergjencë ekonomike kombëtare për t’i zbatuar tarifat, të cilat pritet të prodhojnë qindra miliarda dollarë të ardhura vjetore.
Ai ka premtuar se vendet e punës në fabrika do të kthehen në Shtetet e Bashkuara si rrjedhojë e këtij vendimi, por politikat e tij rrezikojnë ngadalësim të papritur ekonomik pasi konsumatorët dhe bizneset mund të përballen me rritje të mëdha të çmimeve për automjetet, rrobat dhe mallra të tjera.
Zyrtarë të lartë të Shtëpisë së Bardhë u thanë gazetarëve se tarifa bazë prej 10% do të hyjë në fuqi më 5 prill, ndërsa tarifat reciproke do të hyjnë në fuqi pas një jave, më 9 prill.
Kjo shënon ndryshimin më të madh në rendin e tregtisë ndërkombëtare që nga pasojat e Luftës së dytë.
“Taksapaguesit janë grabitur për më shumë se 50 vjet. Por, kjo nuk do të ndodhë më”./vizionplus.tv
@tetovanews
@tn.lajmelokale
