Katër persona, mes të cilëve një vajzë 7-vjeçare dhe babai i saj, kanë humbur jetë në Soccia të Korsikës, nga një “përmbytje” e papritur e kanionit Zoicu. E pajetë mbeti edhe drejtuesja e guidës, ndërkohë që personi i katërt nuk është identifikuar ende.
Lajmi është konfirmuar nga prokurori lokal, Eric Bouillard. Nga tragjedia raportohet se një person i pestë rezulton i zhdukur, ndërsa nëna e vajzës mundi të shpëtonte. Dallga e papritur ishte 3 metra e lartë.Prokurori shpjegoi se viktimat ishin pjesë e një grupi prej 12 vetësh (përfshi guidën), që ndodheshin për një ekskursion në kanionin Zoicu, një prej atraksioneve kryesore turistike e famshme për grykat e saj natyrore dhe ujëvarat, kur papritur disa prej tyre u goditën nga një dallgë e papritur uji që zbriste nga lart.
“Në momentin që grupi u gjend përpara vështirësive, fillimisht dy persona hoqën dorë nga aventura, më pas edhe 4 të tjerë”, thotë prokurori. Pjesa e mbetur prej 7 personash vendosën të vijonin zbritjen, por u surprizuan nga një sasi e jashtëzakonshme uji. “Flasim për një dallgë prej 3 metrash të lartë që i goditi dhe i zhvendosi disa dhjetëra metra”, tha Bouillard.
Dy persona, një burrë dhe djali i tij 16-vjeçar, për fat të mirë arritën të shpëtonin duke u kapur pas një litari, ndërsa për 5 të tjerët nuk pati hapësira shpëtimi.
Kërkimet për personin e fundit që rezulton i zhdukur do të rinisin këtë të enjte, pasi u ndërprenë përgjatë natës. Dallga e papritur dyshohet të jetë shkaktuar nga një stuhi në mal, që shkaktoi rreshje të forta shiu gjatë ditëve të kaluara.
Kanioni Zoicu konsiderohet si një nga më të bukurit e Korsikës, por disa pjesë janë të qasshme vetëm me pajisje të specializuara për udhëtime të tilla.
