47 vjeçari Elham Sallahu dhe djali i tij nëntë vjeçar nga fshati Opajë i komunës së Likovës, janë gjetur të vrarë me armë zjarri mbrëmë në hyrje të fshatit Sllupçan, në vendin e quajtur “Bunari në Sllupçan”.
Siç kanë informuar nga MPB-ja e Kumanovës, trupat janë gjetur nga ana e policisë në makinën e tipit “Opel Astra” me regjistrim të Shkupit.
Prokurori Publik dhe ekipe të policisë së Kumanovës kanë dalë në teren dhe kanë konstatuar se një autori deri tani i panjohur me armë zjarri ka shtënë drejt personave të cilët tani më janë gjetur të vdekur.
Trupat e të vrarëve, me urdhër të Prokurorit Publik janë dorëzuar për obduksion në Institutin për Mjekësi Ligjore dhe Kriminalistikë në Shkup, ndërsa policia po ndërmerr masa për zbardhjen e plotë të rastit.
Policia jep detaje pë vrasjen e dyfishtë në afërsi të Opajës së Kumanovës
Policia ka dhënë detaje për vrasjen e dyfishtë në fshatin Mateç të Kumanovës. “Policë nga stacioni policor në fshatin Mateç, në vendin e quajtur ‘bunari i Sllupçanit’, kanë gjetur një makinë të tipit Opel astra me targa të Shkupit, ku u gjetën dy persona pa shenja jete. Ngjarja është shënuar në orën 22 e 40. Prokurori publik dhe ekipi i SPB Kumanovë, kane dalë në vendin e ngjarjes dhe pas hetimeve kanë konstatuar se një person i panjohur ka vrarë me armë zjarri një 47 vjeçar dhe djalin e tij 9 vjeçar, që të dy nga fshati Opajë, ka deklaruar zëdhënësi i MBP-së, raporton Tv SHENJA. Prokurori publik ka dhënë urdhër për të bërë autopsinë e dy trupave të pajetë, ndërsa policia po punon për zbardhjen e arsyes dhe rrethanavë të vrasjes.
Prokuroria: Janë shtënë më shumë plumba mbi babë e bir në Sllupçan
Sipas Prokurorisë Themelore të Kumanovës, mbi trupin e babait dhe djalit të tij 9-vjeçar në Sllupcan të Kumanovës, janë gjuajtur më shumë plumba në afërsi të automjetit ku mbrëmë u gjetën trupat e tyre. Pritet që autopsia të jap më shumë detale se sa plumba saktësisht janë qëlluar mbi trupat e tyre dhe dinamikën e ekzekutimit.
“Prokuroria Themelore Publike Kumanovë ka kryer hetim në afërsi të fshatit Sllupçan ku mbrëmë ishte gjetur automjeti ndaj të cilit janë gjuajtur shumë plumba. Në hetim ishte konstatuar se nga afër është gjuajtur në automjetin motorik në të cilin kanë qenë dy personat, shoferi dhe djali i tij tetë vjeçar. Të dy janë plagosur dhe kanë vdekur në vendin e ngjarjes. Janë gjetur dhe marrë një numër i madh i plumbave të gjuajtur përmes atyre ekspertizave pritet të konfirmohen fakte të rëndësishme në lëndë. Do të bëhet ekspertizë edhe e automjetit në të cilin të dukshme janë shumë gjurmë të sulmit me armë. Është dhënë edhe urdhër për kryerje të autopsisë së trupave”, citohet në kumtesën e prokurorisë.
