Kosova po kalon një moment mjaft të mirë dhe ëndrra për të kaluar në finalet e një Europiani, nuk është e pamundur.
“Dardanët” e shohin veten në vendin e tretë në grupin e tyre dhe shpresojnë që të arrijnë një kualifikim, falë të cilit mund të marrin pjesë për herë të parë në Europian që në kualifikueset e para.
Pyetja më e madhe që bëhet, është në lidhje me një përballje të mundshme me Serbinë. Ashtu siç dihet, Kosova nuk mund të luajë me Serbinë në fazën e grupeve, ashtu siç nuk mund të luajë as me Bosnje-Hercegovinën.
Ndërkohë, “Indeksoline” ka kontaktuar me zyrën për mediat pranë UEFA-s dhe është interesuar nëse në Europian, mund të ketë përballje të tilla, teksa përgjigja ka qenë shumë e qartë.
“Kosova nuk mund të luajë me Serbinë vetëm në fazën e grupeve. Më pas, nëse e kalojnë këtë fazë ata mund të përballen.
Përveç Serbisë, Kosova nuk mund të luajë në grupe me Bosnje-Hercegovinën”, ishte përgjigja e UEFA-s që nënkupton se Kosova mund të luajë me Bosnjën dhe Serbinë në ndeshjet me eliminim direkt.
