Vrasja e një 22-vjeçareje në Itali ka tronditur mbarë vendin dhe ka nxitur një lëvizje kundër dhunës ndaj grave. Dyshohet se e reja Giulia Cecchettin u vra nga ish-i dashuri i saj posesiv.
Por si ndodhi krimi?
BBC News raporton se më 11 Nëntor të këtij viti, 22-vjeçarja Giulia Cecchettin shkoi të blinte veshjen për ceremoninë e diplomimit në “Inxhinieri Biomjekësore” së bashku me ish-të dashurin e saj, Filippo Turetta. Por, më pas ata u zhdukën. Disa ditë më vonë, u shfaqën disa pamje, në të cilat tregoheshin momentet e fundit të jetës së saj.
Në video, Turetta shihet duke dhunuar ish-partneren e tij në një parking makinash afër shtëpisë së saj në Vigonovo, afër Venecias. Ajo u përpoq të arratisej, por prokurorët thonë se ai i vendosi shirit ngjitës në gojë, e futi me forcë në makinën e tij dhe e dërgoi një zonë industriale, ku e sulmoi përsëri.
Pas një kërkimi njëjavor, trupi i 22-vjeçares u gjet në fund të një kanali, i mbështjellë me qese të zeza plastike. Në trupin e saj u gjetën shenja të një vrasjeje brutale, në kokën dhe në qafën e saj kishte të paktën 20 plagë të thella me thikë. Sipas autoriteteve italiane, mendohet se e reja ka ndërruar jetë natën e 11 Nëntorit.
Policia lëshoi një urdhër-arresti ndërkombëtar dhe nisi një ndjekje masive për Filippo Turetta. Makina e tij u gjurmua duke kaluar përmes Italisë veriore, në Austri dhe më pas në Gjermani. Një javë më vonë, ai u arrestua pranë Leipzigut të Gjermanisë kur një shofer thirri policinë pasi vuri re se ishte i parkuar në autostradë me dritat e fikur. Telefonuesi nuk e kishte idenë se 22-vjeçari kërkohej për vrasje. Deri më tani, Filippo Turetta nuk është akuzuar zyrtarisht dhe pritet të ekstradohet në Itali të shtunën./tvklan.al
View this post on Instagram
