Gjykata e Fierit ka dhënë vendimin e saj për të dënuar fituesin e Big Brother Vip 2, Luiz Ejlli me një vit burg, për shkak se ka falsifikuar dokument në ndihmë të një klienti të tij.
Këngëtari dhe ish-noteri, Luiz Ejlli, falsifikoi një dokument noterial për shtetasin me iniciale F.A., të cilin ky e fundit e dorëzoi pranë ish-Prokurorisë së Lushnjës.
Ky dokument ishte i falsifikuar në përmbajtje, si një justifikim për pasuritë e fituara nga aktiviteti kriminal i shtetasit F.A., e në fund mbante nënshkrimin e Luiz Ejllit.
Edhe pse Luiz Ejllit i ishte hequr licenca nga Ministria e Drejtësisë, ish-noteri kishte ruajtur vulat dhe kështu krijoi deklaratën noteriale me të dhëna të pavërteta që do i shërbenin shtetasit F.A.
Kështu, më 2 tetor u zhvillua seanca gjyqësore në Gjykatën e Shkallës së Parë të Fierit, ku u vendos që Luiz Ejlli të dënohet me 1 vit burg, ndërsa shtetasi F.A., me 1 vit dhe 6 muaj heqje lirie.
Por a do të bëjë burg këngëtari?
Vendimi i dhënë është i shkallës së parë dhe nuk është i formës së prerë. Këngëtari nuk do të përfundojë momentalisht në burg, por ai do të duhet të bëjë rekurs të këtij vendimi pranë Gjykatës së Apelit.
NJOFTIM
Falsifikuan dokumente për të justifikuar burimin e paligjshëm të pasurive me prejardhje nga aktiviteti kriminal, me kërkesë të Prokurorisë Fier dënohet ish-noteri L.E. dhe shtetasi F.A.
Prokuroria pranë Gjykatës së Shkallës së Parë të Juridiksionit të Përgjithshëm Fier kërkoi dënimin me 12 muaj burgim të ish-noterit E.L., dhe shtetasit F.A. të akuzuar për kryerjen e veprës penale ‘Falsifikimi i dokumenteve’ kryer në bashkëpunim, parashikuar nga neni 186, paragrafi 2 i Kodit Penal.
Në kuadër të hetimeve të iniciuara nga ish Prokuroria pranë Gjykatës së Shkallës së Parë Juridiksionit të Përgjithshëm Lushnjë mbi procedimit penal nr. 388, të vitit 2022, me të pandehur, shtetasit L.E dhe F.A., rezultoi e provuar se i pandehuri F.A., në bashkëpunim me të pandehurin L.E., ish-noter, kanë falsifikuar deklaratën noteriale, të cilën i pandehuri F.A. e ka përdorur në Prokurori, për të justifikuar burimin e krijimit të pasurive të tij, të sekuestruara në kuadër të hetimeve të procedimin pasuror nr. 3 të vitit 2021, të ish Prokurorisë pranë Gjykatës së Shkallës së Parë Juridiksionit të Përgjithshëm Lushnjë.
Deklarat noteriale e hartuar nga i pandehuri L.E., ishte falsifikuar në përmbajtjen e saj, por mbante nënshkrimin e këtij të fundit. U provua se, me të njëjtën datë, numër repertori e koleksioni që mbante kjo deklaratë noteriale, në regjistrin e ish noterit L.E. dhe në arkivën e akteve noteriale të hartuara prej tij, në vitin 2015, ekziston një deklaratë noteriale me palë të ndryshme.
Konkretisht, i pandehuri L.E, megjithëse i ishte hequr licensa nga Ministria e Drejtësisë, duke qenë ende në posedim të vulave të noterit, në bashkëpunim me të pandehurin F.A., kanë krijuar deklaratën noteriale me të dhëna të pavërteta, dhe më pas i pandehuri F.A., në datën 25.02.2022, e ka dorëzuar këtë deklaratë noteriale në ish-Prokurorinë Lushnjë.
Në datën 02.10.2024, Gjykata e Shkallës së Parë të Juridiksionit të Përgjithshëm Fier ka përfunduar shqyrtimin gjyqësor të çështjes dhe vendosur të deklarojë fajtor të pandehurit për faktin e dërguar për gjykim, si më poshtë:
Deklarimin fajtor të të pandehurit L.E., për kryerjen e veprës penale “Falsifikimi i dokumenteve”, kryer në bashkëpunim, parashikuar nga neni 186 prag.2, i Kodit Penal, dhe dënimin e tij me 12 (dymbëdhjetë) muaj burgim;
Deklarimin fajtor të të pandehurit F.A, për kryerjen e veprës penale “Falsifikimi i dokumenteve”, kryer në bashkëpunim, dhe dënimin e tij me 18 (tetëmbëdhjetë) muaj burgim.
Prokuroria pranë Gjykatës së Shkallës së Parë Juridiksionit të Përgjithshëm Fier, shpreh angazhimin e plotë për hetimin dhe vënien para përgjegjësisë ligjore të personave që kryejnë vepra penale në fushën e falsifikimit të dokumentave, me qëllim realizimin e përfitimeve në mënyrë të paligjshme.
