Nuk u respektua një minutë heshtje, reaguan edhe Ballistët pas Federatës dhe Shkëndijës

Grupi i tifozëve të ekipit të Shkëndijës së Tetovës, Ballistët, sot reaguan në lidhje me vendimin e Federatës së Futbollit të Maqedonisë (FFM) për të dënuar ekipin nga Tetova për shkak mosrespektimit të një minutë heshtje në ndeshjen fundit, transmeton Portalb.mk.

“Shkëndija dhe i gjithë publiku e respektuan një minutë heshtje, ndërsa një pjesë e Ballistëve jo, megjithatë kënduan këngë për Shkëndijën dhe nuk ishte një këngë provokative, përkundër palës tjetër që shkelin çdo rregull dhe sulmojnë shqiptarët vetëm përshkak se ekzistojnë, duke na uruar vdekje, siç ishte rasti i fundit me shkrimin e autobusit”, reaguan nga Ballistët.

Ata theksojnë që “FFM dhe simotra e tyre MVR” kanë për qëllim të dëmtojnë Shkëndijën dhe të shuajnë tifogrupin “Shkëndija”.

Federata e Futbollit të Maqedonisë më 31 mars vendosi të fillojë procedurën disiplinore kundër Shkëndijës, pasi në ndeshjen e fundit, tifozët e Shkëndijës nuk e kanë respektuar një minutë heshtje. Një minutë heshtje ishte përcaktuar nga Federata duke përkujtuar viktimat e tragjedisë së fundit në Koçani.

“KF Shkëndija shpreh keqardhje për këtë situatë dhe rithekson qëndrimin e saj të palëkundur në respekt të jetëve të humbura dhe dhimbjes që po kalon e gjithë shoqëria”, reaguan më 31 mars nga Shkëndija, duke shpreh keqardhje për këtë situatë dhe rithekson qëndrimin e saj të palëkundur në respekt të jetëve të humbura dhe dhimbjes që po kalon e gjithë shoqëria.

Në zjarrin që ndodhi më 16 mars në një lokal nate në Koçani, kanë humbur jetën 59 persona, ndërsa kishte 196 të lënduar që trajtohen brenda dhe jashtë vendit.

Sipas hetimeve të deritanishme nga institucionet, diskoteka ka punuar me një sërë shkeljesh të mëdha: nuk kishte rrjet hidranti dhe mjaftueshëm aparate PP, përdoreshin materiale piroteknike në mënyrë të paligjshme, nuk kishte as leje pune të ligjshme dhe nuk ishte lidhur asnjë kontratë me shkrim mes organizatorit dhe grupit interpretues.

Prokuroria në Koçan dhe Prokuroria për Ndjekjen e Krimit të Organizuar dhe Korrupsionit kanë identifikuar si të dyshuar gjithsej 34 persona dhe tre kompani për krime të rënda kundër sigurisë publike. Ndërkaq, Ministria e Punëve të Brendshme ka ngritur kallëzime penale kundër tyre, në mesin e tyre ka ish-funksionarë shtetërorë. Në paraburgim janë 24 persona.