Trump paralajmëron Iranin: SHBA mund të godasë sërish për uraniumin e pasuruar

 Presidenti amerikan Donald Trump ka bërë një deklaratë të fortë këtë të premte, duke paralajmëruar se Shtetet e Bashkuara mund të ndërmarrin një tjetër sulm ushtarak ndaj Iranit nëse çështja e uraniumit të pasuruar nuk trajtohet me seriozitet. Kjo deklaratë erdhi si përgjigje ndaj komenteve të liderit suprem iranian, Ali Khamenei, i cili u shpreh se “ka fituar luftën”.

Trump theksoi se SHBA nuk do të qëndrojë e heshtur përballë provokimeve dhe kërkoi që inspektorë të Agjencisë Ndërkombëtare të Energjisë Atomike (IAEA) ose një strukturë tjetër e besueshme të lejohen të kontrollojnë objektet bërthamore të Iranit, pas sulmeve të fundjavës së kaluar të kryera nga SHBA dhe Izraeli. Megjithatë, Teherani ka refuzuar inspektimet.

Gjithashtu, presidenti amerikan tha se nuk beson se Irani synon ende të zhvillojë armë bërthamore pas këtyre sulmeve dhe shtoi se “Irani dëshiron të hyjë në negociata”.

Në një tjetër temë, Trump theksoi se “Spanja do të vijë në vete” dhe do të rrisë shpenzimet për mbrojtjen në nivelin prej 5% të Prodhimit të Brendshëm Bruto, sipas angazhimit në NATO, një vendim që Spanja ka qenë e ngurruar ta marrë.

Në lidhje me kriptomonedhat, Trump tha se “nëse SHBA nuk do të kishin zhvilluar kriptomonedha, do të ishin kinezët ata që do ta bënin këtë”.