Samiti i Singaporit përfundoi të martën me një angazhim të Shteteve të Bashkuara dhe Koresë së Veriut për çarmatimin bërthamor të gadishullit Korean. Por njoftimi që shkaktoi më shumë bujë nuk ishte pjesë e marrëveshjes së nënshkruar zyrtarisht. Presidenti Donald Trump, pas takimit ka shprehur në mënyrë të përsëritur angazhimin e tij për të ndalur manovrat e përbashkëta ushtarake të Shteteve të Bashkuara dhe Koresë së Jugut që ai i quajti “lojëra luftarake”. Vendimi i Presidentit Trump ka krijuar paqartësi në mesin e aleatëve dhe ushtrisë amerikane të dislokuar në Korenë e Jugut.
Një moment historik në Singapor: Presidenti Trump zhvillon bisedime me udhëheqësin e Koresë së Veriut Kim Jung Un.
Pas bisedimeve Presidenti Trump i tha bashkëpunëtores së Zërit të Amerikës, Greta Van Susteren, se ai dëshiron të ndalë stërvitjet e përbashkëta ushtarake mes Shteteve të Bashkuara dhe Koresë së Jugut, që janë zhvilluar për dekada të tëra.
“Ne do të dalim nga manovrat luftarake që kushtojnë aq shumë para. Së pari, unë mendoj se ato janë shumë provokuese, prandaj dua që kjo të arrihet. Mendoj se ata janë shumë të gëzuar për këtë sepse është tepër provokuese. Gjithashtu kushtonte jashtëzakonisht shumë. Ne nuk do ta bëjmë këtë për aq kohë sa të negociojmë në mirëbesim“.
Disa ekspertë u befasuan kur dëgjuan presidentin amerikan duke i karakterizuar stërvitjet e përbashkëta ashtu siç i përshkruan ato Kina dhe Koreja e Veriut.
“Ai i quajti ato “provokuese”, një gjë që unë mendoj se asnjë president amerikan nuk e ka bërë. Ato gjithmonë kanë qenë të një natyre “mbrojtëse””, thotë Kyle Ferrier nga Instituti Ekonomik i Koresë në Amerikë.
Edhe Koreja e Jugut u befasua nga vendimi, dhe një zëdhënës i qeverisë saj tha se : “Ne duhet ta gjejmë kuptimin e saktë ose synimet e komenteve të Presidentit Trump”.
Një zëdhënës i ushtrisë amerikane në Korenë e Jugut u tha gazetarëve se trupat “nuk kanë marrë udhëzime të reja mbi ekzekutimin ose ndalimin e manovrave” dhe do të vazhdonin me qëndrimin aktual ushtarak derisa të merrnin një urdhër zyrtar për të ndryshuar misionin.
Disa e shohin vendimin e Presidentit Trump për të ndalur manovrat ushtarake si një hap prapa dhe një lëshim.
“Në fillim të vitit Kim Jong Un bëri një deklaratë ku në thelb thoshte se ai e kuptonte vlefshmërinë ligjore dhe nevojën për të mbajtur këto manovra. Tani, disa muaj më vonë, Presidenti Trump po thotë: “Ne do të heqim dorë nga manovrat.” Ky është një ndryshim i madh pa asnjë veprim nga ana e Koresë së Veriut”, thotë Kyle Ferrier nga Instituti Ekonomik i Koresë në Amerikë.
Të tjerët nuk janë dakord me këtë vlerësim, duke e quajtur këtë veprim si një hap të parë të guximshëm drejt qëllimit përfundimtar të çarmatimit bërthamor.
“Nëse kjo është vetëm një pauzë, atëherë nuk është një lëshim. Pra, ne nuk po japim asgjë. Ne thjesht nuk po ndërmarrim veprime, ndërsa vazhdojmë të stërvitemi, dhe ne kemi aftësitë tona që nuk zvogëlohen. Por nëse kjo mund të çojë në uljen e kërcënimeve dhe përfundimisht në një traktat paqeje, atëherë kjo padyshim është në interesin e Amerikës”, thotë Daniel Davis, Ish Lejtnant Kolonel amerikan nga organizata Defense Priority.
Tani për tani, çdo ndryshim i numrit të trupave amerikane në gadishullin Korean mbetet jashtë tryezës së bisedimeve, pasi Presidentit Trump i kërko Kim Jong Un-it të sigurojë hapa të verifikueshëm drejt çarmatimit bërthamor.(VOA)
