Kryetari i Kuvendit të Kosovës, njëherit dhe kreu i Partisë Demokratike, Kadri Veseli ka dënuar rëndë kërcënimet e bëra ndaj familjeve të pjesëtarëve të Forcës së Sigurisë së Kosovës të komunitetit serb.
Në një reagim të tij, ai ka thënë se tentimet e vazhdueshme të politikës serbe për ta penguar dhe dëmtuar integrimin e qytetarëve serbë të Kosovës, janë në kundërshtim me parimet e fqinjësisë së mirë, njofton Klan Kosova.
”Kërcënimi i familjeve të pjesëtarëve të Forcës së Sigurisë së Kosovës, të komunitetit serb, është i papranueshëm.
Dënojmë të gjitha aktet që kanë për qëllim destabilizimin e Kosovës dhe cenimin e jetës së qytetarëve tanë. Dhe sigurojmë të gjithë qytetarët e Republikës së Kosovës, pa dallim etnie, se ne do t’i mbrojmë ata.
Sot, institucionet e rendit dhe sigurisë në Kosovë kanë përmbushur detyrën e tyre, duke arrestuar pesë persona të dyshuar për cenim të sigurisë dhe rendit.
Tentimet e vazhdueshme të politikës serbe për ta penguar dhe dëmtuar në çdo hap integrimin e qytetarëve serbë të Kosovës janë në kundërshtim me parimet e fqinjësisë së mirë, interesave të qytetarëve serbë në Kosovë, vlerave europiane dhe aspiratave për integrimin në BE.
Institucionet e Kosovës janë gjithmonë të gatshme për dialog dhe fqinjësi të mirë. Çdo provokim nga Serbia, që e lëndon këtë proces, nuk i kontribuon interesave të të dyja vendeve që synojnë normalizimin e marrëdhënieve dhe stabilitetin e paqen në Ballkan”.
