Ambasadori francez në Shkup, Christian Thimonier tha se Parisi nuk ka marrë ende një vendim përfundimtar nëse do të aprovojë hapjen e negociatave me Maqedoninë Veriore, një ankth që e ka dhe Tirana në raport me Parisin.
Thimonier i tha TV21 se ata ende nuk kanë marrë një vendim përfundimtar, por se një fillim i mundshëm i negociatave do të jetë një hap përpara. Sidoqoftë, ai shtoi se vendimi i Parisit varet nga sundimi i ligjit në Maqedoninë Veriore, domethënë në vazhdimin e ndjekjes penale të çështjeve të Prokurorisë Speciale dhe dhënien fund të dukurisë së mosndëshkimit për elitat politike në atë vend.
“Pozicioni francez është ende duke u përcaktuar. Bisedime të rëndësishme kanë ndodhur më parë gjatë vizitës së ministrit të Jashtëm maqedonas Nikola Dimitrov në Paris dhe po analizohet të gjitha argumentet pozitive që ai ka ofruar në lidhje me fillimin e negociatave të BE me Maqedoninë Veriore”, tha Thimonier.
Ai shtoi se Franca kishte marrë në konsideratë të gjitha hapat pozitivë që ishin arritur në Maqedoninë Veriore, veçanërisht nënshkrimin e Marrëveshjes së Prespës.
Dje, Komiteti i Punëve të Jashtme i Bundestagut gjerman miratoi një rekomandim për fillimin e negociatave me Shqipërinë dhe Maqedoninë Veriore.
Këshilli Evropian do të vendosë më 18 tetor nëse BE do të fillojë negociatat e pranimit me Shkupin dhe Tiranën pasi vendimi u shty në qershor të këtij viti.
