Në zonat që sot udhëhiqen nga talebanët ndër vite kanë punuar me mijëra shqiptarë nga Kosova. Ata kanë shkuar kryesisht nëpërmjet kompanive të mëdha amerikane duke shërbyer për periudha të gjata.
Dritëro Zhitija kishte punuar si kontrollor ajror në Afganistan. Për më shumë se një vit ai punoi në kampin Marmal në qytetin Mazar-e Sharif. Pavarësisht se ishte një zonë lufte, punën në Afganistan ai e cilëson krejtësisht normale.
“Një ditë e imja ka qenë shumë e zakonshme. Unë s’kam dalë kurrë jashtë bazës, kam ateru në bazë, komplet kohën e kam kaluar në bazë dhe kur ka ardhur koha me ardh në pushim ose me u kthy, prapë prej bazës jam kthy’, tregoi ai për RTK-në.
Por a ishte rrezik puna në një zonë ku konfliktet pothuajse ishin të përditshme ndërmjet afganëve dhe talebanëve.
“Shpeshherë këto ngjarje që kanë ndodh në Afganistan i kam marrë vesh kur kam fol me të shtëpisë time. Unë me të thënë të drejtën nëse s’i kam lexuar lajmet, s’i kam dëgjuar në kamp”, shpjegoi Zhitija.
Për një vit ai kishte punuar me kolegë afganë e me të cilët ka kontaktuar pak ditë më parë pasi talebanët morën nën kontroll Afganistanin. Si Dritëro ka me mijëra shqiptarë nga Kosova që ndër vite punonin në Afganistan.
Në vitin 2011 Instituti GAP kishte realizuar një hulumtim sipas të cilit nga Afganistani shqiptarë nga Kosova në total marrin 50 deri në 55 milionë euro brenda vitit.
