Një zyrtar i lartë rus kërcënoi se do të ndërpresë furnizimin me gaz natyror të Evropës në përgjigje të ndalimeve të mundshme të importit të naftës që Moska mund të përballet së shpejti për pushtimin e saj në Ukrainë.
“Në lidhje me akuzat e pabaza kundër Rusisë… dhe mbylljen e gazsjellësit Nord Stream 2, ne kemi çdo të drejtë të marrim një vendim pasqyrë dhe të vendosim një embargo ndaj pompimit të gazit përmes gazsjellësit Nord Stream 1, i cili sot është i ngarkuar në niveli maksimal prej 100%”, tha zëvendëskryeministri rus, Alexander Novak, në një fjalim televiziv.
Ai vuri në dukje vendimin e rregullatorëve gjermanë muajin e kaluar për të ndaluar certifikimin e gazsjellësit të dytë të kompanisë Gazprom, Nord Stream 2.
Rusia furnizon rreth 40% të gazit të Evropës. Gjermania, ekonomia më e madhe e bllokut, mbështetet në Rusi për pothuajse 50% të gazit të saj natyror.
Sekretari amerikan i Shtetit Antony Blinken tha të dielën se SHBA-ja dhe aleatët po eksploronin në mënyrë aktive më shumë mënyra për të ndaluar importet e naftës ruse, të cilat do të dëmtonin ekonominë e Rusisë edhe më tej, ndërsa ajo përpiqet të përballet me sanksionet e dëmshme ekonomike.
Perëndimi ka hezituar deri më tani të vendosë sanksione të rëndësishme ndaj sektorit energjetik të Rusisë për shkak të mënyrës se si mund të ndikojë në ekonominë globale, por tani po i afrohet një gjëje të tillë pasi Evropa punon për të diversifikuar burimet e saj të energjisë.
