Zbulimi amerikan paralajmëron se Irani po kërkon të vrasë ish –Presidentin amerikan Donald Trump. Në lidhje me këtë zyrtarët e zbulimit në Uashington kanë informuar shtabin elektoral të kandidatit republikan, përmes një letre ku nuk jepen detaje për natyrën e kërcënimit.
Sipas shtabit elektoral të Trump-it, qëllimi i këtyre përpjekjeve është të shkaktojnë kaos dhe të destabilizojnë Shtetet e Bashkuara, në kulmin e perplasjeve të brendshme politike të fushatës për zgjedhjet presidenciale.
Edhe vetë Trump është shprehur më herët në rrjetin social X se ka patur përpjekje të tilla nga Irani, të cilat nuk kanë funksionuar, por që ata do ta provojnë sërish. Teherani nuk ka reaguar deri më tani për paralajmërimin e agjensisë amerikane te zbulimit.
Sakaq të shtëna me armë zjarri dyshohet se janë shënuar drejt zyrës së fushatës zgjedhore të Kamala Harris në Arizona. Zyrtarët shtuan se të shtënat kanë ardhur nga persona të paidentifikuar në mesnatë, ndërsa në zyrë nuk ndodhej askush. /vizionplus.tv
