Të paktën tetë persona humbën jetën për shkak të shirave të dendur në Brazil, të cilat lanë më shumë se një milion familje pa energji elektrike në shtetin e Sao Paulos, njoftuan autoritetet.
Deri në 100 mm shi në ditë, erëra 100 km/h dhe breshër: disa zona të pjesëve qendrore dhe juglindore të vendit janë goditur nga stuhi të forta që nga e premtja, sipas Institutit Kombëtar Meteorologjik (Inmet).
Në shtetin e Sao Paulos, më i populluari i vendit, 7 persona vdiqën nga rënia e pemëve dhe shembja e mureve të ndërtesave, njoftoi agjencia shtetërore e Mbrojtjes Civile.
Në Brasilia, kryeqyteti i vendit, një ushtar u vra dhe një tjetër u plagos nga një pemë që u rrëzua teksa ulnin flamurin përpara selisë së policisë, sipas administratës ushtarake të rajonit.
Në kryeqytet, zyrtarëve të Dhomës së Përfaqësuesve iu desh të hapnin çadrat gjatë një seance plenare për shkak të rënies së ujit nga çatia, ndërsa rrjedhjet preknin pajisjet elektronike, sipas imazheve të shpërndara nga media dhe mediat sociale. .
Pjesa më e madhe e qytetit të Sao Paulos mbeti në errësirë dhe të paktën 1.6 milionë familje ishin pa energji elektrike, tha në të njëjtën kohë grupi energjetik Enel.
“Në disa zona, seksione të tëra të rrjetit janë dëmtuar dhe kilometrat e rrjetit do të duhet të rindërtohen, duke zëvendësuar shtyllat, transformatorët dhe pajisjet e tjera”, tha grupi në një mesazh.
Shirat e rrëmbyeshëm vijnë pas një prej thatësirave më të këqija të Brazilit që nga fillimi i regjistrimeve, duke nxitur zjarret.
Në Brasilia, shirat e dendur u pritën me lehtësim pas një rekord prej 165 ditësh pa shi. /vizionplus.tv
