Rrjeti social i Donald Trump i quajtur “Truth Social” ka fituar 500 milionë Dollarë në aksione me vetëm një postim të Presidentit të zgjedhur.
Aksionet u rritën gjysmë miliardë Dollarë neto pas një postimi të Donald Trump ditën e premte.
Aksionet e këtij rrjeti social që zotërohet nga Donald Trump kishin rënë javët e fundit. Një ditë para zgjedhjeve presidenciale të 5 Nëntorit u rritën papritur. Pas fitores së Trump patën një luhatje për shkak të disa thashethemeve që pretendonin se Donald Trump do t’i shiste aksionet.
Kjo bëri që të reagonte vetë Trumpi përmes një postimi në rrjetin social “Truth”.
“Ka thashetheme, deklarata të rreme, të pavërteta, ndoshta dhe të paligjshme të bëra nga manipulatorë të tregut se jam i interesuar të shes aksionet e Truth Social. Këto thashetheme janë të rreme. Nuk kam asnjë qëllim të shes”.
Vetëm ky postim i Donald Trump ia rriti vlerën e aksioneve kësaj kompane me 500 milionë Dollarë.
Shitja e aksioneve të Trump mund të jetë e vështirë për shkak se ai është aksioneri kryesor i Truth Social. Por pikëpyetjet bien mbi faktin sepse tashmë Donald Trump është shpallur President i SHBA. Fakti që Donald Trump mund të përfitojë financiarisht vetëm nga deklaratat që bën në platformën e zotëruar prej tij, ka ngritur shqetësime, sipas CNN.
Megjithatë, kompania “Truth Social” është shumë më e vogël në krahasim me rivalët e saj X, Instagram apo TikTok./tvklan.al
