Drejtësia hungareze njoftoi sot se ka urdhëruar ndalimin e një të dyshuari irlandez pasi trupi i një turisteje amerikane 31-vjeçare u gjet në një valixhe në një pyll pasi u vra në Budapest .
Mackenzie Elizabeth Michalski, një infermiere nga shteti i Oregonit, u zhduk të martën në mbrëmje pasi u pa në distriktin e klubeve të natës në kryeqytetin hungarez.
Pas sinjalizimit nga të afërmit e saj, hetuesit dolën me skenarin e vrasjes së saj pasi analizuan pamjet e kamerave të sigurisë.
I arrestuar të enjten, 37-vjeçari pranoi krimin, duke pretenduar se ishte një aksident, tha policia.
“Për momentin nuk është e mundur të përcaktohet shkaku i vdekjes”, tha gjykata e Budapestit në një deklaratë për shtyp.
Sipas dëshmive fillestare, i dyshuari e ka takuar viktimën në një lokal para se ta çonte në banesën e tij ku e kishte vrarë “gjatë marrëdhënies seksuale”.
Më pas ai e futi trupin e saj në një valixhe dhe e çoi me automjetin e tij drejt liqenit Balaton, pak më shumë se 2 orë nga kryeqyteti hungarez, ku e fshehu trupin e saj “në pyll”.
Hetuesit gjetën gjurmë të kërkimeve në internet të lëna nga i dyshuari pas krimit në lidhje me dekompozimin e kufomave, praninë e derrave të egër në zonë, apo edhe shkallën e juridiksionit të policisë lokale.
Ky shtetas irlandez, i cili mbërriti në Budapest në fund të tetorit, nuk ka precedentë penalë në vendin e Evropës Qendrore.
Duke folur për AFP, ministri i jashtëm i Irlandës tha se ai ishte “në dijeni të rastit dhe ofrimit të ndihmës konsullore”, pa komentuar më tej.
Përballë lajmit për zhdukjen e saj, prindërit e së resë fluturuan për në Budapest, me shpresën për ta kthyer atë në shtëpi, por mësuan për vdekjen e saj gjatë udhëtimit të tyre.
Të shtunën ata morën pjesë në një vigjilje në kujtim të saj pranë ambasadës amerikane, duke falënderuar të gjithë ata që u mobilizuan për të gjetur vajzën e tyre. /vizionplus.tv
