Një gjykatë në Moskë dënoi të martën shtetasin amerikan Eugene Spector me 15 vjet burg për spiunazh, thanë mediat shtetërore ruse.
Spector, i cili tashmë po vuante një dënim 3 vite e gjysmë në Rusi për ryshfet, iu komunikua akuza më e rëndë e spiunazhit në vitin 2023. Një dënim i ri prej 13 vitesh në një burg të sigurisë sëlartë iu shtua të martën kohës që ai kishte vuajtur tashmë, duke e çuar totalin në 15 vjet, njoftoi agjencia e lajmeve RIA Novosti.
Gjyqi u mbajt me dyer të mbyllura “për shkak të fshehtësisë së materialeve të çështjes”, sipas agjencisë së lajmeve Interfax.
“Vetëm pjesët hyrëse dhe vendimtare të dënimit u shpallën nga gjykata.”
Spector lindi në atë që atëherë ishte Bashkimi Sovjetik dhe më vonë u transferua në Shtetet e Bashkuara, ku mori nënshtetësinë. Ai u kthye në Rusi si i rritur dhe u bë ekzekutiv në një kompani pajisjesh mjekësore.
Ai u arrestua në vitin 2020 me akuzën se kishte mundësuar ryshfet për një ndihmës të ish-zëvendëskryeministrit rus Arkady Dvorkovich. Spector u dënua në një gjykatë në Moskë vitin e ardhshëm dhe gjithashtu u gjobit me rreth 14 milionë rubla, ose rreth 140,000 dollarë sot.
Ndihmësja, Anastasia Alekseyeva, e cila u raportua se kishte marrësi ryshfet udhëtime të shtrenjta jashtë shtetit, u dënua me 12 vjet burg, sipas mediave ruse.
Në gusht të vitit të kaluar, autoritetet ruse i dorëzuan Spector akuzat shtesë për spiunazh, megjithëse hollësitë e rastit nuk u bënë publike, thanë raportet e mediave lokale.
Përveç Spector, disa amerikanë të tjerë mbahen në Rusi. Arrestimet e shtetasve amerikanë në Rusi janë shtuar vitet e fundit, veçanërisht që nga pushtimi i plotë i Ukrainës nga Moska në vitin 2022.
Uashingtoni ka akuzuar Moskën për shënjestrimin e qytetarëve amerikanë me akuza të pabaza, me synimin për t’i përdorur ato si pazare për të siguruar lirimin e rusëve të dënuar jashtë vendit për krime të rënda.
Në gusht, Rusia liroi tre amerikanë, duke përfshirë gazetarin e Wall Street Journal, Evan Gershkovich, i cili ishte burgosur me akuza për spiunazh për Shtetet e Bashkuara, si pjesë e shkëmbimit më të madh ndërkombëtar të të burgosurve që nga Lufta e Ftohtë.
Shkëmbimi përfshinte 24 të burgosur të mbajtur në shtatë vende: Rusia dhe Bjellorusia nga njëra anë dhe Shtetet e Bashkuara, Gjermania, Sllovenia, Polonia dhe Norvegjia nga ana tjetër.
Rusia liroi 16 të burgosur, duke përfshirë një të burgosur në Bjellorusi, dhe mori tetë persona në këmbim, duke përfshirë atentatorin Vadim Krasikov, i cili ishte mbajtur në Gjermani.
