Një bos droge shqiptar ka zbuluar arsyen pse beson se policia britanike nuk do t’i mposhtë kurrë bandat që kontrabandojnë kokainë në Mbretërinë e Bashkuar.
“Gangsteri”, i cili foli për MailOnline në mënyrë anonime, tha se një nga praktikat kryesore të mafiozëve shqiptarë ishte të mos lejonin policinë t’i ndalnin plotësisht aktivitetet e tyre kriminale në Britani.
Që nga viti 1995, shqiptarët kanë qenë lojtarë të rëndësishëm në tregtinë e kokainës në Itali, Belgjikë, Holandë dhe Spanjë, duke pasur rrjete të mirë-vendosura furnizimi.
Për të hyrë në tregun e Mbretërisë së Bashkuar në fund të vitit 2000, ata përdorën si moto ‘shit lirë dhe shit më shumë’.
Një shqiptar në Londër, i cili kreu 17 vjet burg si pjesë e një grupi të madh kriminal të organizuar në tregtinë e kokainës, shpjegoi se një arrestim nuk do të thoshte domosdoshmërisht fundi i rrugës.
Që nga viti 2005, Agjencia Kombëtare e Krimit dhe Drejtoria e Krimit të Specializuar në Scotland Yard kanë arrestuar dhe dënuar qindra shqiptarë të përfshirë në tregtinë e kokainës.
Në fund të vitit të kaluar kishte pothuajse 1,100 shqiptarë në burg, përfshirë edhe bosët e dyshuar të mafias ballkanike që transportonin kokainë në rrugët e Britanisë.
Përveç kontrollit të tregtisë së drogës, “gangsterët” shqiptarë që terrorizojnë Mbretërinë e Bashkuar janë dënuar gjithashtu për vrasje, krime seksuale, pastrim parash dhe kontrabandë njerëzish.
Por, sapo shkatërrohet një grup i krimit të organizuar shqiptar, një i ri me sa duket e zëvendëson atë.
“Gangsteri” i tha MailOnline se kjo ishte për shkak të një praktike të quajtur ‘shitja e punës’.
Ai tha se kur arrestohej një anëtar i bandës, nëse policia nuk arrinte t’i merrte telefonin, bashkëpunëtorët e tij do ta shisnin telefonin, dhe kontaktet në të, për deri në 100,000 paund.
NCA ka paralajmëruar për vite me radhë për “kërcënimin e konsiderueshëm” që paraqesin bandat shqiptare, të njohura për profesionalizmin dhe disiplinën e tyre, si dhe për taktikat e egra për të mbajtur larg konkurrencën.
Bandat shqiptare kanë dominuar tregtinë britanike të drogës, duke negociuar drejtpërdrejt me kartelet kolumbiane dhe duke i dëmtuar rivalët kriminelë për të përmbytur rrugët e Britanisë me kokainë të lirë.
Në vitin 2010, vetëm 1.5 përqind e shtetasve të huaj të burgosur në Angli dhe Uells ishin shqiptarë.
Por deri në fund të vitit 2024, shqiptarët përbënin 10.6 përqind, më shumë se çdo kombësi tjetër.
Numri në rritje i shqiptarëve është pjesërisht për shkak të numrit të madh që kalojnë kanalin. 12,685 persona arritën në Britani me anije të vogla në vitin 2022.
Megjithatë, shkalla ka rënë që kur ministrat nënshkruan një marrëveshje për transferimin e të burgosurve me qeverinë e Shqipërisë në vitin 2022.
Nën sundimin e Rishi Sunak, 200 persona u deportuan në këmbim të 8 milionë paundëve për të modernizuar sistemin shqiptar të burgjeve.
Partia Laburiste është zotuar të deportojë kriminelët e huaj më shpejt, duke thënë se “nuk mund të jetë e drejtë” që taksapaguesit të paguajnë faturën.
Mendohet se strehimi i çdo të burgosuri kushton rreth 40,000 paund në vit, duke sugjeruar që Mbretëria e Bashkuar shpenzon 44 milionë paund për burgosjen e kriminelëve shqiptarë.
Megjithatë, bosi shqiptar i drogës mburrej se si ai dhe gangsterët e tjerë arritën të dominonin tregun e kokainës.
Ai tha: “Ne kishim pastërtinë më të lartë të kokainës për një gram të shitur në rrugë. Kjo i bëri përdoruesit ekzistues ta merrnin drogën nga ne dhe t’i braktisnin shitësit ekzistues.”
Kjo bëri që organizata ime, ku isha unë, të bëhej furnizuesi kryesor i kokainës për Portsmouth dhe Bournemouth.
Në vitin 2009/10 e ulëm çmimin për një kilogram kokainë nga 35,000 paund në 30,000 paund.
‘Ky ishte një ndryshim rrënjësor për tregun në atë kohë’.
NCA vitin e kaluar tha se tregtia e drogës e lidhur me shqiptarët ishte aktive në të gjithë vendin në qytete, qyteza dhe madje edhe në zona rurale.
“Objektivi i tyre kryesor kur fitojnë para është t’i nxjerrin ato nga vendi sa më shpejt të jetë e mundur”, tha Steve Brocklesby, Menaxher i Inteligjencës nga NCA.
NCA është kontaktuar për koment./vizionplus.tv
@tetovanews
@tn.lajmelokale
