Sekretari i Shtetit i SHBA-së, Marco Rubio tha këtë të martë se heqja e sanksioneve ndaj Sirisë është një hap kritik drejt shpëtimit të qeverisë kalimtare, duke paralajmëruar se një luftë civile mund të jetë vetëm disa javë larg. Duke folur para Komitetit të Senatit për Marrëdhëniet me Jashtë, Rubio deklaroi se Presidenti i SHBA-së Donald Trump mori një “vendim të guximshëm, duke urdhëruar heqjen e të gjitha sanksioneve kundër Sirisë dhe qeverisë së saj”.
Rubio dhe Trump u takuan javën e kaluar në Riad me udhëheqësit e tranzicionit sirianë, përfshirë edhe Ahmed Hussein al-Sharaa, i cili është shpallur terrorist nga SHBA-të. Al-Sharaa dhe udhëheqja siriane kanë një “histori të vështirë”, tha Rubio, duke shtuar: “Ana tjetër e çështjes është se nëse i përfshijmë, mund të jemi në gjendje t’ia dalim”.
Sekretari i Shtetit i SHBA-së paralajmëroi se Siria përballet me rrezikun e një lufte civile në shkallë të plotë nëse qeveria kalimtare nuk mbështetet. “Vlerësimi ynë është se duke pasur parasysh sfidat me të cilat përballet, është ndoshta javë, jo shumë muaj, larg një kolapsi të mundshëm dhe një lufte civile në shkallë të plotë me përmasa epike, në thelb shpërbërjes së vendit.”
Rubio foli për sfidat e sigurisë që paraqet rihapja e Ambasadës Amerikane në Damask pasi aktualisht, funksionet e Ambasadës Amerikane për Sirinë kryhen nga Turqia. ©LAPSI.al
@tetovanews
@tn.lajmelokale
