Shërbimi i mesazheve të koduara Telegram ka hyrë në një partneritet me kompaninë e inteligjencës artificiale të Elon Musk, xAI.
Duke njoftuar marrëveshjen në mediat sociale, shefi i Telegram, Pavel Durov, tha se firma e tij do ta shpërndante asistentin e inteligjencës artificiale, Grok, te “mbi një miliard përdorues të Telegram dhe do ta integronte atë në aplikacionet e saj”.
Z. Durov tha se marrëveshja – e cila do të zgjasë një vit – do t’i japë kompanisë së tij 300 milionë dollarë (223 milionë paund) në para të gatshme dhe kapital nga xAI, plus 50% të të ardhurave nga abonimet në xAI të shitura nëpërmjet Telegram.
“Së bashku, fitojmë!”, shkroi ai në rrjetet sociale.
Kjo vjen pas përfshirjes së një shërbimi të inteligjencës artificiale nga Meta në shërbimin e saj të mesazheve, WhatsApp – një zhvillim që u detyrua ta mbronte pas ankesave nga përdoruesit.
Ky bashkëpunim bashkon dy nga figurat më të gjalla dhe ndonjëherë kontraverse në teknologji.
Z. Durov u arrestua në Francë në gusht 2024, pasi u akuzua se nuk e moderoi siç duhet aplikacionin e tij për të ulur kriminalitetin.
Kritikët e kishin quajtur platformën “rrjeti i errët në xhep” për shkak të asaj që ata e quanin sasi të madhe të aktivitetit kriminal që diskutohej në platformë.
Megjithatë, zoti Durov ka mohuar se nuk ka bashkëpunuar me zbatimin e ligjit në lidhje me trafikimin e drogës, përmbajtjen e abuzimit seksual me fëmijë dhe mashtrimin.
Platforma gjithashtu ka hedhur poshtë akuzat se politikat e saj të moderimit nuk janë mjaftueshëm të forta.
Z. Musk ka një gamë tepër të gjerë interesash në teknologji, duke filluar nga startup-i i implanteve të trurit Neuralink deri te firma e tij e prodhimit të raketave, SpaceX.
Ai gjithashtu ka një rol të spikatur në administratën e Presidentit të SHBA-së Donald Trump dhe bëri fushatë të madhe për ta zgjedhur atë – diçka që analistët thonë se po kontribuon në rënien e shitjeve në firmën e tij më të njohur, prodhuesin e makinave elektrike Tesla.
Njeriu më i pasur në botë ka investuar gjithashtu shumë në inteligjencën artificiale.
Ai ishte bashkëthemelues i firmës më të njohur të inteligjencës artificiale në botë, OpenAI, kompania që prodhon ChatGPT.
Më pas ai u largua dhe u përfshi në një mosmarrëveshje të gjatë me shefin e OpenAI, Sam Altman, në lidhje me drejtimin e saj të ardhshëm.
Më herët këtë vit, zoti Musk udhëhoqi një përpjekje të dështuar për ta blerë atë.
Ai gjithashtu ka kërkuar të zhvillojë xAI si një rival ndaj OpenAI dhe liderëve të tjerë të industrisë.
Në mars, ai njoftoi se kishte blerë X , platformën e mediave sociale të njohur më parë si Twitter, në një marrëveshje që e vlerësoi xAI në 80 miliardë dollarë (61.8 miliardë paund).
@tetovanews
@tn.lajmelokale
