Temperaturat kësaj jave kulmuan të enjten e bashkë me to tensionet në sallën e Kuvendit, atje ku mund të themi me bindje se u nis gatimi i edhe “petullave”, pasi nuk munguan vezët, mielli dhe uji.
Rubrika humoristike e emisionit “Kjo Javë” në News 24 ka regjistruar disa prej momenteve më pikante të seancës që do të mbetet gjatë në memorien e shqiptarëve.
Të parët që siguruan videon e momentit kur minisitri i Jashtëm Ditmir Bushati i përgjigjej, instiktivisht siç tha, “sulmit” me miell e vezë të deputetëve të opozitës, ishin kolegët e News 24, por kjo nuk mbaron me kaq. Për të gjithë ata që nuk kanë qënë të vëmendshëm, ministri në atë moment dobësie edhe ka sharë ndër dhëmbë. Shihni videon për ta kuptuar se çfarë thotë.
Mes kaosit e rrëmujës, edhe kryeministri kapet disa herë duke bërë lëvizje të ndryshme. Në një moment madje kamera e ka fiksuar teksa ndjek veprimet e zv.ministres Senida Mesi. Kjo e fundit me një “shami” në dorë sigurohet të fshijë gjurmët e miellit në tryezën e kryeministrit Rama.
Nga ana tjetër edhe deputetët e opozitës janë kapur në momente të ndryshme. Teksa deputeti socialist Erjon Braçe fliste nga vendi, ata ironizionin duke u shprehur: “Ngrihu në këmbë”.
E ndërsa kjo javë u mbyll me një vizitë të anuluar të kryeministrit Rama në Shkodër, atje ku sot pati edhe protesta kundër përfshirjes së biznesit të vogël me xhiro deri në 2 milion lekë në skemën e TVSH-së, të gjithë pyesin: Çfarë na pret javën tjetër?
http://www.balkanweb.com/site/petullat-gatuhen-ne-kuvend-pervec-ujit-ministri-bushati-hedh-edhe-fjale-video/
