Nga plumbat e polices ai ka pësuar lëndime të rënda në krahun e majtë dhe që atëherë dora e tij është pjesërisht e paralizuar
Një police kantonale po përgjigjet para Gjykatës së Lartë (kantonale) të Cyrihut për tentimvrasje të kryer me dashje.
Ishte një mbrëmje me shi dhe e zymtë e majit të vitit 2016, transmeton albinfo.ch. Një police kantonale në Ossingen të regjionit Zürcher Weinland kishte qëlluar tri herë përmes dritares së hapur të shoferit, mbi një burrë të ulur në makinën e tij.
Policja kishte vepruar kështu, me mendimin se ai ishte hajduti që ishte në kërkim, për çfarë e kishte njoftuar një banor i zonës.
Siç doli më vonë, i qëlluari me armë kishte qenë me të vërtetë hajduti i kërkuar, një shtetas kosovar, i cili më pas është dëbuar në Kosovë.
Nga plumbat e polices ai ka pësuar lëndime të rënda në krahun e majtë dhe që atëherë dora e tij është pjesërisht e paralizuar, shkruan Tages Anzeiger.
Prokurori e ka akuzuar policen tashmë 36-vjeçare për tentimvrasje me dashje dhe ka kërkuar një dënim me burgim prej tre vitesh, nga të cilat ajo duhet të vuajë një vit burg efektiv.
E akuzuara u lirua nga kjo akuzë nga Gjykata e Qarkut në Andelfingen në shtator 2020, por u dënua me gjobë me kusht për dëmtim të rëndë trupor nga pakujdesia, përcjell albinfo.ch. Policja kishte pretenduar se kishte vepruar në vetëmbrojtje.
Ajo ka thënë se hajduti po nxirrte një armë kur ajo i kishte kërkuar të dilte jashtë. Për këtë arsye, avokati i saj ka kërkuar lirim për klienten e vet.
Për gjykatën e përmendur të qarkut, të shtënat e shkrepura nga policja ishin reagim i tepruar. Gjykata i ka besuar shpjegimit të saj se ajo ndihej e kërcënuar, por ka konstatuar se ajo kishte shkelur parimin që e detyronte si police të tregonte kujdesin e duhur në atë rast.
Edhe prokuroria publike edhe mbrojtja e kanë shtyrë aktgjykimin më tej dhe kështu çështja ka arritur të martën në Gjykatën e Lartë të Cyrihut./Express
