Hungaria do t’i lejojë trupat e NATO-s të vendosen në perëndim të territorit të saj, ndërsa u ka hapur dritën jeshile edhe dërgesave të armëve për të kaluar drejt vendeve të tjera anëtare.
Me anë të një vendimi, qeveria hungareze u jep mundësinë trupave të NATO-s të kalojnë tranzit nga toka dhe ajri përmes Hungarisë dhe në Hungari në perëndim të Danubit. Gjithashtu lejohen forcat e NATO-s të kalojnë tranzit në raste të tjera, të tilla si pjesëmarrja në stërvitje dhe misione stërvitore, me përjashtim të rasteve kur destinacioni i tyre përfundimtar është Ukraina.
Në shkurt, NATO kërkoi vendosjen e katër grupeve të reja beteje në Evropën Juglindore. Rreth 1,000 trupa do të dërgohen në Bullgari dhe Rumani, dhe potencialisht Sllovaki dhe Hungari, për t’iu përgjigjur agresionit ushtarak të Rusisë në Ukrainë.
Qasja e qeverisë hungareze në kë të aspect po shihej me kujdes, për shkak të raporteve të kujdesshme të Orbanit me Rusinë.
Që nga nisja e agresionit rus, Hungaria ka deklaruar se nuk do të dërgojë armë në Ukrainë dhe nuk do të lejojë që armët vdekjeprurëse të kalojnë tranzit në territorin e saj për ta mbajtur vendin të sigurt.
Sipas dekretit qeveritar, Budapesti po i qëndron vendimit të tij për të mos lejuar që dërgesa armësh vdekjeprurëse të kalojnë përmes territorit të saj drejt Ukrainës, por vetëm në “shtetet e tjera anëtare aleate”.
Kjo bëhet “për të zbatuar një politikë kombëtare më të rreptë për të mbrojtur interesat e saj thelbësore të sigurisë”, thuhej në dekret.
Megjithatë, disa nuk e shohin këtë vendim si kthesë të qartë për politikën e Hungarisë ndaj fqinjit të saj lindor të shkatërruar nga lufta.
“Së pari, nuk ka asnjë informacion të disponueshëm në lidhje me ftesën e trupave të NATO-s, apo negociata të vazhdueshme për vendosjen e ndonjë kontigjenti ushtarak, të ndonjë vendi aleat të NATO-s, në Hungari”, tha për EURACTIV analisti hungarez Dániel Hegedüs nga Fondi Gjerman Marshall.
Sipas tij, nuk duket që qasja e përgjithshme ndaj Ukrainës të ketë ndryshuar.
Duke folur në një ngjarje të fushatës të premten e kaluar, kryetari i parlamentit László Kövér, një aleat i ngushtë i Orbanit, tha se sipas tij, Hungaria nuk do të përfitojë nga ky konflikt, “pavarësisht nga rezultati, ne jemi tashmë humbësit”.
