Koalicioni i rebelëve sirianë ka arritur sukses mahnitës në më pak se 10 ditë. Në një kohë të shkurtër ata pushtuan qytetin e dytë më të madh sirian të Alepos, ndërsa dje Hamën, qytetin e katërt më të madh në vend që është një çelës në rrugën drejt Damaskut, kryeqytetit të vendit dhe bazën e pushtetit të diktatorit sirian Bashar al-Asad.
Siç tha udhëheqësi i rebelëve Abu Mohammed al-Jolani në një intervistë ekskluzive për CNN, gjithashtu intervista e tij e parë pas shumë vitesh, qëllimi përfundimtar është përmbysja e regjimit të Asadit.
Intervista është regjistruar në Siri dhe në të al-Jolani ka folur për krijimin e një qeverie të bazuar në institucione dhe një “këshill të zgjedhur nga populli”.
Duhet të theksohet se rebelët udhëhiqen nga grupi Hayat Tahrir al-Sham (HTS), i cili u formua nga një ish-degë e organizatës terroriste islamike Al-Kaeda. Megjithatë, udhëheqësit e HTS-së, në dëshirën e tyre për të mbledhur kryengritësit, po distancohen nga praktikat e mëparshme radikale islamike.
“Qëllimi i revolucionit mbetet përmbysja e këtij regjimi. Është e drejta jonë të përdorim të gjitha mjetet në dispozicion për të arritur këtë qëllim”, tha al-Jolani për CNN.
“Iranianët u përpoqën të ringjallnin regjimin, duke i blerë kohë dhe më vonë u përpoqën ta mbështesin edhe rusët. Por e vërteta mbetet: ky regjim ka vdekur”, tha ai.
Që kur nisën ofenzivën nga veri-perëndimi i vendit një javë më parë, rebelët kanë avancuar me shpejtësi marramendëse, duke marrë nën kontroll qytetin e dytë më të madh të vendit, Aleppon, përpara se të pushtonin qytetin strategjik të Hamës dje. Ofensiva tronditëse i dha një goditje të rëndë Assadit dhe mbështetësve të tij në Iran dhe Rusi dhe rindezi luftën civile.
Forcat e opozitës siriane janë të shpërndara dhe të përbëra nga ideologji të ndryshme, megjithëse i bashkon qëllimi i përbashkët për të përmbysur regjimin e Asadit. Por rrënjët e HTS dhe al-Jolanit në lëvizjet ekstremiste islamike hedhin hije dyshimi mbi ambiciet e tyre.
Pavarësisht përpjekjeve të al-Jolanit për të distancuar grupin e tij të ri nga Al-Kaeda, Shtetet e Bashkuara e kanë shpallur HTS-në organizatë terroriste në vitin 2018 dhe kanë ofruar një shpërblim prej 10 milionë dollarësh për kapjen e tij.
Ai filloi si luftëtar i ri i Al-Kaedës kundër SHBA-së në Irak. Pas kthimit në atdhe gjatë luftës civile siriane, ai drejtoi degën e grupit terrorist në Siri që asokohe quhej Jabhat al-Nusra. Ai ndërpreu lidhjet me al-Kaedën dhe organizata e tij u shndërrua në Hayat Tahrir al-Sham në fillim të vitit 2017, e njohur gjithashtu si Organizata për Çlirimin e Levantit.
SHBA, Turqia, Kombet e Bashkuara dhe disa vende të tjera perëndimore ende e konsiderojnë HTS-në organizatë terroriste, pavarësisht përpjekjeve të grupit për t’u distancuar nga rrënjët e tij.
Intervista e Al-Jolanit me CNN të enjten ishte një largim nga retorika e linjës së ashpër që ai përdori gjatë intervistës së tij të parë televizive në 2013, kur ai u intervistua nga Al Jazeera. Në atë kohë, deklaratat e tij synonin zhvillimin e mëtejshëm të degës së Al-Kaedës në Siri.
Të enjten, al-Jolani prezantoi një vizion ndryshe për vendin e shkatërruar nga lufta. Në një përpjekje për të “riemërtuar” veten, ai përdori publikisht emrin e tij të vërtetë për herë të parë – Ahmed al-Sharaa – në vend të emrit me të cilin ai njihet gjerësisht, të cilin e ka vendosur për të asocuar me Lartësitë e Golanit, një rajoni në Izraelin e sotëm prej nga ai e ka prejardhjen.
Derisa koalicioni rebel zgjeron me shpejtësi territorin nën kontrollin e tij, al-Julani këmbëngul se civilët nuk kanë pse frikësohen nga forcat e tij.
