Kanë përfunduar takimet e përfaqësuesve të subjekteve politike për dialogun Kosovë-Serbi me përfaqësuesin special të presidentit të SHBA-ve, ambasadorin Richard Grenell.

Së fundi, Grenell, u takua me kryetarin e PDK-së, Kadri Veselin e më pas edhe me kryetarin e Aleancës për Ardhmërinë e Kosovës, Ramush Haradinaj.

Ashtu sikur kryetari i Lëvizjes Vetëvendosje, Albin Kurti dhe ai i LDK-së, Isa Mustafa, as Veseli dhe Haradinaj nuk u prononcuan për media.

Grenell gjatë ditës së sotme është takuar edhe me presidentin e Kosovës, Hashim Thaçi.

Pas përfundimit të takimit me emisarin special të presidentit të SHBA-së për dialogun, Zyra e presidentit, Hashim Thaçi, ka lëshuar një komunikatë për media në të cilën thuhet se Richard Grenell ka shprehur pritjet e tij që dialogu ndërmjet Kosovës dhe Serbisë të rifillojë së shpejti dhe të gjendet një zgjidhje finale, shkruan Gazeta Express.

Sipas Grenellit arritja e një marrëveshjeje do të kishte impakt pozitiv për zhvillimin e gjithë rajonit.

Ndërkohë, Thaçi ka thënë se Kosova do të jetë konstruktive në gjetjen e një zgjedhjeje, e cila do t’i hapë rrugë zhvillimit dhe ka shtuar se “pjesëmarrja aktive e SHBA-së në gjetjen e një zgjidhjeje përfundimtare ndërmjet Kosovës dhe Serbisë do të jetë përcaktuese”.

Pas takimit ndërkohë ka reaguar edhe ambasadori amerikan në Prishtinë, Philip Kosnett, i cili ka qenë i pranishëm në këtë takim Thaçi – Grenell.

Kosnet ka thënë se përfaqësuesi special i Trumpit për dialogun mezi pret të punojë me krerët e shtetit për të ndihmuar arritjen e paqes dhe prosperitetit në Kosovë.

“I dërguari special i presidentit Trump, Richard Grenell, mezi pret të punojë me presidentin Thaçi dhe liderët tjerë të Kosovës për të ndihmuar në arritjen e paqes, drejtësisë dhe prosperitetit në Kosovë dhe rajon”, ka shkruar Kosnett në Twitter.

Njoftimi i plotë i Presidencës:

Presidenti i Republikës së Kosovës, Hashim Thaçi, sot ka pritur ambasadorin Richard Grenell, përfaqësues special i presidentit të SHBA-së, Donald Trump, për Marrëveshjen e Paqes në mes të Kosovës dhe Serbisë.

Presidenti Thaçi ka falënderuar ambasadorin Grenell për mbështetjen që Shtetet e Bashkuara të Amerikës i kanë dhënë Republikës së Kosovës në të gjitha periudhat.

“Që nga viti 2008, nuk ka pasur kaq vëmendje të SHBA-së për Kosovën”, u shpreh presidenti Thaçi dhe shtoi se “kjo shton konfidencën dhe besimin tonë në kërkimin e Marrëveshjes së Paqes me Serbinë”.

Në këtë takim është thënë se Marrëveshja e Paqes në mes Kosovës dhe Serbisë do t’i kontribuonte zhvillimit të Kosovës dhe tërë rajonit.

Ambasadori Richard Grenell, përfaqësues special i presidentit të SHBA-së, Donald Trump, ka thënë se shpreson se Kosova dhe Serbia do të takohen së shpejti dhe do të gjejnë një zgjidhje.

Ai ka theksuar se një marrëveshje ndërmjet dy shteteve do të vërë themelin për rritje ekonomike dhe do të kontribuojë për mirëqenien e gjithë qytetarëve.

Presidenti Thaçi ka thënë se Republika e Kosovës do të jetë konstruktive në gjetjen e një zgjedhjeje, e cila do t’i hapë rrugë zhvillimit dhe ka shtuar se “pjesëmarrja aktive e SHBA-së në gjetjen e një zgjidhjeje përfundimtare ndërmjet Kosovës dhe Serbisë do të jetë përcaktuese”.

Nënkryetari i Lidhjes Demokratike të Kosovës, Lutfi Haziri, që ishte edhe shef i shtabit zgjedhor të kësaj partie në zgjedhjet e 6 tetorit, ka pranuar se kjo parti nuk ka arritur të dalë e para në zgjedhje.

Haziri ka thënë se Albin Kurti arriti të sjellë votën e partisë së tij në popullaritetin që ai vet kishte.

Ai ka thënë se LDK ka kryesuar deri në mesditën e së dielës, por sipas tij trendet ndryshuan më pas, duke e nxjerr Vetëvendosjen të parën.

Nënkryetari i LDK-së ka thënë në Rtv Dukagjini se pavarësisht numrit të madh të votave nga diaspora dhe ato me kusht nuk presin ndryshim rrënjësor të rezultateve aktuale, e që do të mund të përmbysnin kryesimin e Vetëvendosjes.

Shef i shtabit zgjedhor të LDK-së ka thënë se fituesi i madh i këtyre zgjedhjeve është Vetëvendosje ndërsa fituesi i dytë është LDK-ja, përcjell Telegrafi.

“Trendi gjatë këtyre 48 orëve të fundit është i qartë. Mund të ketë ndryshim të votave në promila por jo sa të ndryshojë rezultatin e zgjedhjeve”.

Haziri ka thënë se nuk do të ketë vështirësi në formimin e qeverisë pasi dy partitë kryesore bashkë me minoritetet do të përbëjnë shumicën kushtetuese prej 2/3.

I ftuar në KTV, kryetari i Lëvizjes Vetëvendosja, Albin Kurti, është shprehur se mund të ketë një takim ditën e enjte me Vjosa Osmanin dhe Isa Mustafën për të folur për formimin e qeverisë së ardhshme.

Para pak orësh edhe Isa Mustafa nëpërmjet një statusi në “Facebook” ka konfirmuar se do të ketë një takim me Kurtin.

Kurti, i pyetur nëse ekziston opsion tjetër për formimin e qeverisë përveçse me LDK-në, është shprehur i prerë: Jo, nëse nuk bëhet me LDK-në, shkojmë në zgjedhje sërish.

Kurti gjithashtu shtoji se Lista serbe dhe PDK, duhet që të shkojnë në opozitë.

Lideri i Vetevendosjes Albin Kurti, dha një intervistë për gazetaren e Vizion Plus, Olta Blaceri ku shpalosi të gjitha objektivat dhe prioritetet e punës së tij si kryeministër i ri i Kosovës.

Kurti u ndal tek marrëdhëniet me Shqipërinë, dialogu me Serbinë, politikat ekonomike, bashkëpunimi me LDK apo puna për reformat integruese.

Më poshtë intervista e plotë e Albin Kurtit për Vizion Plus.

Zoti Kurti qytetarët e Kosovës vendosën dhe ju besuan ju, siç thatë dhe ju ato përcaktuan ndryshimin, por në të vërtetë çfarë do të bëni ju në ndryshim nga paraardhësi zoti Haradinaj?

Së pari ne do të zvogëlojmë qeverinë dhe do të forcojmë shtetin. Synimi jonë është që të kemi 12 ose 13 ministri dhe jo 21 dhe çdo ministri të ketë një ose dy zëvendës ministra dhe jo katër siç ishte deri më tani, pra në kohën e ish kryeministrit, ku në një qeveri që zgjati më pak se dy vjet kishim qeveri që ishte më shumë se pushtet dhe shtet që ishte më shumë se republikë, kjo ndryshon radikalisht, ne e kuptojmë politikën dhe qeverisjen si interes në shërbim të qytetarëve. Në aspektin ekonomik ne duam që të krijojmë fondin sovran investues që ndërmarrjet qëndrore publike ja marrin qeverisë, ndërmarrjet shoqërore ja marrin agjensionit kosovar të privatizimit dhe i strukturon sëbashku, ku nuk ja nënshtron as likujdimit, as koncesionimit as privatizimit, por shitjes së aksioneve. Këto ndërmarrje duhet të regjistrohen si shoqëri koncesionare. Këtë e kanë bërë prej një holdingu sovran shtetëror në Slloveni deri tek ministria e Thesarit në Poloni, vendet e Evropës Lindore që kanë kaluar në tranzicion. Në këtë mënyrë ne shpëtojmë ndërmarrjet shoqërore nga likujdimi dhe privatizimi dhe ndërmarrjet publike nga privatizimi dhe falimentimi. Do të bëjmë dhe Bankën Zhvillimore meqë duhet që të ulen kreditë e kamatave nën 3 % me një periudhë 5 vjeçare me qëllim që të lulzojnë ndërmarrjet e vogla dhe do të luftojmë monopolet nuk do të ketë më oligarkë në Kosovë. Do të luftojmë krimin dhe korrupsionin me prokurori të fuqizuar dhe me prokurim të dekriminalizuar. Prokuroria jonë është shumë pasive ajo pret që ti shkojnë kallzimet penale në zyrë, ndërkohë që raportin vjetor të zyrës kombëtare të auditimit nuk e lexon, pasi nëse do e lexonte do të gjende pafund shkelje për të shkruar akt akuza për zyrtarë të ndryshëm. Nuk do të ketë me në qeveri korrupsion do ta luftojmë korrupsionin në institucione dhe në shoqëri. Do të bëjmë procesin e vettingut prokuroria dhe gjyqësia patjetër, por edhe gjyqësia dhe inteligjenca, por këto dy të fundit do ti bëjmë vetëm për pozita udhëheqëse. Do ta lidhim ekonominë me arsimin sepse ekziston një hendek i shkathtësive, duhet të sigurohemi se diploma e universitetit dhe tregu i punës e kanë një urë ndërmjet. Aktualisht në Kosovë mbi 20 mijë vajza e djem kanë mbaruar universitetin, por nuk gjejnë dot punë. Papunësia afatgjatë është shumë e përhapur. Do të kemi shtesa për fëmijë dhe do të kemi skema të posaçme për punësimin e moshave 16-18 vjeç një vit së paku. Synimi ynë është që të mos ketë asnjë familje pa kulm mbi kokë dhe asnjë shtëpi pa dikë të punësuar. Do të lidhim Prizrenin me Tetovën me aksin aty, pastaj Gjakovën me Shkodrën, Deçanin me Plavën dhe Gjilanin me Kumanovën, por për këtë duhet të flasim me të gjithë këto vende. Do i japim hov Kosovës përsa i përket integrimeve Evropiane, sepse ne duam të antarsohemi në BE dhe ai duhet të mbrohet si projekt i paqes dhe i mirëqenies. Por pa harruar Republikën e Shqipërisë sepse ne nuk duhet të harrojmë se jemi një kombë me dy shtete, prandaj mundësitë tona dhe detyrat që kemi janë shumë më të mëdha se realiteti që gëzojmë.

Ju ju drejtuat mbështetësve, ku folët për marrëdhënie shumë të mira me ndërkombëtarët, pasi Kosova ka nevojë për shumë miq. Shqetësimi më i madh i ndërkombëtarëve është dialogu me Serbinë. Cila është qasja juaj në këtë?

Më duhet të them se shqetësimi i ndërkombëtarëve në këto dy vitet e fundit ka qenë korrupsioni që ato ndryshe e kanë quajtur korrupsioni endemek, unë mendoj se me faktorët ndërkombëtar mund të bashkëpunojmë përsa i përket gjeopolitikës dhe socioekonomise, pra gjeopolitika është horizontale ndërsa socioekonomia është vertikale dhe në raport me Serbinë ne nuk kemi pasur deri më sot udhëheqje që e kanë shtruar drejt problemin. Problemi shtrohet drejt atëherë kur ne tregojmë se Serbia na ka borxh dhe ajo është një borxhli i keq, sepse në Kosovë kemi ende rreth 1500 të pagjetur nga lufta e fundit, i kemi 10 mijë civil të pambrojtur dhe të paarmatosur të cilët janë vrarë para 20 viteve dhe kemi rreth 20 mijë gra e vajza të përdhunuara. 860 mijë shqiptarë janë depërtuar jashtë Kosovës në pranverë të vitit 1999, ndërkaq mbi një milion janë dëbuar nga shtëpitë e tyre, na i kanë plaçkitur fondin e kursimeve pensionale, fondin e depozitave bankare, kanë plaçkitur 1200 artifate kulturore dhe asnjë cent nuk kanë paguar për këto, dhe ne nuk kemi pasur asnjë qeveri që ja kërkon borxhin Serbisë. Unë jam i interesuar që me faktorët ndërkombëtar ta krijojmë kontekstin e drejtë në të cilën Kosova i kërkon borxhin Serbisë që ishte agresore, akupatore ku në fund dhe tentoi gjenocidin mbi popullin tonë.

Çfarë prisni ju nga marrëdhëniet me Tiranën zyrtare?

Vendet e Bashkimit Evropian të eurozorës, kanë valutën e përbashkët kanë bankën e përbashkët në Franfurt kanë tregun e përbashkët dhe ne nuk kemi asnjërën prej tyre, ndërkohë janë nënshkruar 50 marrëveshje. Jemi interesuar që të krijojmë një komision të përbashkët, nëse nuk ekziston një i tillë për ta verifikuar shkallën e ndikimit të atyre marrëveshjeve. Nuk mjafton që Kosova dhe Shqipëria të prodhojnë lajme sensasionale nga takimet bilaterale një herë në vit apo njeherë në dy vite, është e domosdoshme që nga këto mbledhje të dalin punë të cilat të kryhen. Pra duhet zbatuar marrëveshja dhe jam për krijimin e institucioneve të përbashkëta. Mund të them për një akademi të shkencave të arteve dhe deri te një lloj decentralizimi sa i përket funksioneve. Nuk ka nevojë që dhe në Kosovë dhe në Shqipëri të ketë Universitet që merret me miniera, minerale dhe me çështjen e energjisë, le të jetë në Mitrovicë, por nuk ka nevojë të ketë fakultet të turizmit në Kosovë, le të jetë në Durrës ose në Vlorë. Mund të bëjmë kështu siç kanë bërë dy Gjermanitë ku një mori të institucioneve nuk i kanë të centralizuara. Unë do të angazhohem për një komision të përbashkët qeveritar, midis Kosovës dhe Shqipërisë, sa i përket politikës së Jashtme, sa i përket Mbrojtjes dhe sigurise, dhe burimeve natyrore. Gjithashtu do të angazhohem për një regjistër të përbashkët të bizneseve dhe të regjistrit të përbashkët civil, në mënyrë që këto hapa integrues të jenë në përputhje me dëshirat dhe nevojat e qytetarëve tanë që janë në të dy anët e kufirit, por ndjehen historikisht dhe aktualisht një komb.

“Pas zgjedhjeve të parakohshme parlamentare,në Kosovë ka ndodhur një tërmet i madh politik”. Kështu shkruajnë mediat serbe lidhur me zgjedhjet në Kosovë.

Një ditë pas zgjedhjes dhe shpalljes së fitores së Lëvizjes Vetëvendosje, Kurti ka folur për qeverinë e re. Në një prononcim për portalin serb ‘N1’, Kurti deklaroi se ai do të përfshijë në qeveri ato parti politike serbe, që nuk janë pjesë e Listës Serbe.

“Kushtetuta jonë thotë se duhet të ketë të paktën një ministër nga komuniteti serb në qeverinë tonë. Por Kushtetuta nuk thotë se duhet të jetë nga Lista Serbe. Kështu që ne do t’i përqendrojmë prioritetet tona në pakicat si komunitete, jo si parti. Kemi nevojë për një dialog rreth dialogut. Ne duhet ta përgatisim mirë dialogun, sepse nuk mund të dështojmë përsëri, sepse do të kushtojë shumë.

Do të shohim edhe ato 33 marrëveshje që kemi pasur nga 2011-2017, çfarë është përmbushur dhe çfarë jo dhe cilat janë ndikimet në jetën e njerëzve në Kosovë dhe një ditë do të fillojmë një dialog me Serbinë, i cili duhet të ketë parime të mira të forta”, -tha Kurti.

Kurti deklaroi se taksa 100 për qind ndaj mallrave serbe nuk ishte politikë e partisë së tij, por se angazhohet për reciprocitet të plotë në të gjitha fushat.