Ndërsa dy futbollistët kosovarë që përfaqësojnë Zvicrën, Granit Xhaka e Xherdan Shaqiri trazuan jo pak Serbinë me bërjen e shqiponjës, në anën tjetër me ndërmjetësim të Bashkimit Evropian në Bruksel rikthehet dialogu mes Kosovës e Serbisë për normalizim marrëdhëniesh.
Thaçi, pa lejen e opozitarëve do të përballet me homologun e tij serb Aleksandër Vuçiç me të cilin priten të diskutojnë dy tema. Njërën që insiston pala kosovare që është energjia, dhe temën që synon ta shtyjë përpara pala serbe që është themelimi i Asociacionit të Komunave me shumicë serbe.
Për dy temat në fjalë është arritur marrëveshje në takimet e mëhershme mes palëve, por që nuk po gjejnë zbatim.
Nëse kihen parasysh deklaratat e dy presidentëve para takimit nuk pritet të ketë ndonjë marrëveshje pasi dy palët do synojnë të shtyjnë përpara temat e tyre.
Beogradi zyrtar ka njoftuar se është ankuar te BE-ja pas deklaratave të bërë nga Thaçi dhe zv.kryeministri Enver Hoxhaj se Asociacioni duhet të bëhet njëkohësisht me anëtarësimin e Kosovës në OKB.
Drejtori të ashtuquajturës Zyrë për Kosovën në Serbi, Marko Gjuriç ka deklaruar për mediat serbe se deklaratat e tilla tregojnë se Kosova nuk është e interesuar për kompromis dhe dialog.
“Për të qenë i sinqertë unë nuk pres asgjë nga bisedimet. Ata nuk duken të gatshëm për dialog dhe kompromis, dhe nuk ka ndonjë arsye për pritje të veçanta.
Vuçiç dje u takua me përfaqësues të BE-së se nëse Thaçi dhe Hoxhaj vazhdojnë me qëndrime të tilla, atëherë është e kot për të folur”, ka thënë Gjuriç, në një intervistë për RTS, duke shtuar se Asociacioni është një nga temat kryesore që duhet të diskutohet.
Por duke ditur se pala serbe kërkon që Asociaconi të ketë kompetenca ekzekutive, pala kosovare vështirë se mund të lëshojë pe.
Ky është raundi i fundit i dialogut me Serbinë. Është paralajmëruar se në faza të mëvonshme do të diskutohen edhe tema tjera si demarkimin e kufirit çka e paralajmëroi edhe Thaçi së fundmi në një konferencë për gazetarë.
Para nisjes së takimit kokë me kokë, Thaçi e Vuçiç do të zhvillojnë takime ndaras me shefen e BE-së, Federica Mogherini.
Ata nuk pritet të dalin me konferencë të përbashkët, por sigurisht të dy si edhe herave tjera do flasin pas takimit për mediat, ku do të tregojnë se si ka shkuar takimi. Edhe BE zakonisht njofton se ç’farë kanë biseduar palët dhe nëse është arritur ndonjë kompromis.
Duke parë takimet e kaluara, edhe ky i sotmi mund të zgjasë me orë të tëra.
Dialogu ndërmjet Kosovës dhe Serbisë zhvillohet në dy nivele, atë politik, ku delegacionet përfaqësohen nga presidentët e shteteve apo kryeministrat, dhe niveli teknik, që zhvillohet përmes ekipeve të ekspertëve, ministrave dhe përfaqësuesve të institucioneve nga të dyja shtetet.
Fillimisht, bisedimet nisën me takimet në nivelin teknik në mars të vitit 2011. Por, ndërkohë, po me lehtësimin e Brukselit, u iniciuan edhe takimet në nivelet më të larta politike.(tesheshi)
