Kancelari i ri gjerman Olaf Scholz nga Partia Socialdemokrate, SPD u zgjodh në Bundestag nga shumica e deputetëve. Kryetarja e Bundestagut, Bärbel Bas (SPD), bëri të ditur se Scholz ka fituar 395 vota, ndërsa 303 deputetë ishin kundër. Pati edhe gjashtë abstenime.
Tre vota ishin të pavlefshme. Për t’u zgjedhur në këtë post atij i duheshin 369 vota. Për kancelarin e ri kanë votuar partitë SPD, të Gjelbrit dhe FDP, të cilët së bashku kanë 416 vota.
Nga kjo shihet se ai nuk i ka marrë të gjitha votat e partive në koalicionin e ri në pushtet. Bundestagu gjerman ka aktualisht 736 deputetë.
Kancelari i nëntë
63-vjeçari Olaf Scholz është kancelari i katërt i SPD-së pas Willy Brandt, Helmut Schmidt dhe Gerhard Schröderit. CDU deri tani ka pasur katër kancelarë Konrad Adenauer, Ludwig Erhard, Kurt Georg Kiesinger dhe Helmut Kohl. Ndërsa sot mori fund epoka e kancelares Angela Merkel e cila në këtë post ishte 16 vite me radhë.
Kancelari i ri pas zgjedhjes dhe pranimit të detyrës, shkon në Pallatin Bellevue ku pritet nga Presidenti Frank-Walter Steinmeier, i cili do ta emërojë edhe zyrtarisht në këtë post. E më pas do të kthehet në Bundestag për të bërë betimin. Pas betimit Scholz duhet të kthehet sërish në Pallatin Bellevue, ku në prani të Presidentit duhet të emërojë ministrat e kabinetit./DW
Video bonus:
https://youtu.be/SjMumKQAtB8
