Personi në foto është Armelind Rexha, një 22-vjeçar shqiptar i cili shkoi në Britani të Madhe për të ndjekur studimet për Master. Por në vend të kësaj, ai përfundoi duke kultivuar kanabis.
I riu shqiptar u dënua nga gjykata angleze me 2.8 vite burgim, pasi u gjet fajtor për mbjelljen e 800 bimëve narkotike. Shtëpinë e tij e kishte kthyer në një punishte, brenda së cilës ushtronte aktivitetin ilegal. Ai u arrestua më 7 Dhjetor të vitit të kaluar, pasi policia shkoi për kontroll. Autoritetet u njoftuan nga banorët e zonës, të cilët kishin krijuar dyshime rreth jetesës së Armelind Rexhës.
Prokurorja e çështjes, Emma Atkinson tha se 22-vjeçari kishte krijuar dy dhoma të ndryshme për kultivimin e lëndëve narkotike, vlera e të cilave shkonte deri në 672 mijë Paund. Armelind Rexha ka pranuar kultivimin e drogës, por tha se ishte detyruar nga persona të tjerë dhe familja e tij ishte kërcënuar.
Avokati i tij mbrojtës u shpreh në gjykatë se Rexha është person i diplomuar dhe puna e tij fillestare ishte si kopshtar, por gjërat morën përmasa më të mëdha. 22-vjeçari kishte nevojë për të ardhura që të përballonte studimet Master, argumentoi avokati, duke shtuar se shqiptari e ka pranuar fajin.
Kurse gjykatësi deklaroi se sasia e lëndëve narkotike ishte pothuajse prodhim i kategorisë industriale. Ai pranoi gjithashtu se Armelind Rexha ishte vetëm një kopshtar, ndoshta i detyruar apo kërcënuar nga persona të tjerë, por ishte i vetmi që u gjet pranë plantacioneve kur u krye operacioni policor. Për këtë arsye, 22-vjeçari u dënua me 2 vite e 8 muaj burgim. /tvklan.al
