Qeveria e Maqedonisë së Veriut pranoi propozimet e Komisionit për sëmundje ngjitëse për masat e reja për mbrojtje nga kovid19, të cilat kësaj radhe kanë të bëjnë me punën e objekteve hotelierike, transmeton Portalb.mk.
Analiza e anketave epidemiologjike ka treguar se mbledhja masive e personave, me mos respektimin e protokolleve, janë një ndër arsyet kryesore për rritjen e numrit të rasteve me Kovid19.
Sipas vendimit, së pari, do të ndalohet shfaqja e këngëtarëve dhe DJ-ve në të gjitha objektet e hotelierisë. Do të zvogëlohet numri i njerëzve që mund të ulen në një tryezë në hotelieri nga 12 tani të lejuar në 4. Volumi i lejuar i muzikës është zvogëluar dhe është i kufizuar në 55 decibel. Të gjitha këto masa janë miratuar njëzëri.
Ministri i Shëndetësisë Venko Filipçe pas takimit me Komisionin për Sëmundjet Infektive në lajmet në televizionin Kanal 5 sot tha se ka një rritje të numrit të rasteve në të gjitha grupmoshat mbi 20 vjeç dhe theksoi se nuk ka rritje të numrit të rasteve në grupe nga 10 në 20 vjet , dhe nën 10 vjet. Rritja më e lartë është në grupmoshën prej 20 deri në 30 vjeç, dhe nga 30 në 40 vjeç, pak më e ulët në grupmoshën prej 50 deri në 60 vjeç.
“Sot, Komisioni miratoi disa propozime që do të paraqiten në seancën e sotme të Qeverisë, këto janë si më poshtë: së pari, për të ndaluar shfaqjen e këngëtarëve dhe DJ-ve në të gjitha objektet e hotelierisë. Ju kujtojmë që diskotekat dhe klubet e natës nuk kanë leje pune, ne insistojmë që të respektohet orari i punës në restorante deri në 12 gjatë ditëve të javës dhe 1 pas mesnate në fundjavë. Volumi i lejuar i muzikës është zvogëluar dhe është i kufizuar në 55 decibel sipas rregullores sonë të Ministrisë së Shëndetësisë, në mënyrë që të zvogëlohet përqendrimi më i madh i njerëzve në një vend. Ne gjithashtu rekomandojmë zvogëlimin e numrit të njerëzve që mund të ulen në një tryezë në hotelineri nga 12 tani të lejuar në 4. Ne e prisnim këtë, ne njoftuam se presioni do rritet, një mini valë që supozohej të ndodhte në muajt e vjeshtës filloi, për shkak të përqendrimit më të madh të njerëzve tashmë pas përfundimit të pushimeve. ”- theksoi Ministri Filipçe.
