Shpresa që fundi i pandemisë së koronavirusit po afrohej u soll nga lajmi se vaksina e testuar nga BioNTech dhe Pfizer u gjet të ishte 90 përqind e efektshme, shkruan The Guardian.
Sidoqoftë, ekspertët vazhdojnë të paralajmërojnë se të dhënat nga testet e kryera nga Pfizer dhe BioNTech nuk janë përfundimtare dhe se shumë gjëra mbeten të panjohura.
Sa e sigurt është?
Kompanitë pretendojnë se nuk ka shqetësime serioze të sigurisë deri më tani, por se ata do të vazhdojnë të mbledhin të dhëna.
Ka disa efekte anësore, të tilla si ethet, e cila është mjaft e zakonshme me vaksinat, tha Paul Hunter, një profesor në Universitetin e Anglisë Lindore.
Ai shtoi se meqenëse kjo është një vaksinë e re, e cila përdor teknologjinë mARN dhe e cila nuk është aprovuar për përdorim te njerëzit deri më tani, nuk është e pamundur që dikush të jetë alergjik ndaj ndonjë prej përbërësve.
A mund të parandalojë një formë më të rëndë të sëmundjes?
Studimi është krijuar për të zbuluar nëse vaksina mund të mbrojë nga forma e rëndë e COVID-19, tha Pfizer.
Të dhënat për këtë nuk janë publikuar ende.
“Ajo që mund të themi është se vaksina ka ndaluar një infeksion klinik simptomatik, por ka paqartësi në lidhje me infeksionin asimptomatik,” tha Dr. Hunter.
Siç theksoi Alexander Edwards, një profesor në Universitetin e Reading, ka kuptim që nëse nuk infektoheni, nuk mund të sëmureni edhe rëndë.
A e pengon vaksina transmetimin?
Ende nuk është plotësisht e qartë nëse vaksina mbron nga infeksioni i koronavirusit ose shfaqja e simptomave pas infektimit.
“Nëse ndalon infeksionin, atëherë sipas përkufizimit duhet të ndalojë transmetimin nga një person tek tjetri. Nëse nuk merrni infeksion sepse jeni imunizuar, sigurisht që nuk do të infektoni. Por nëse ajo që merrni është një infeksion asimptomatik, ekziston ende një rrezik që të mund të më infektoni, megjithëse pothuajse me siguri do të jetë shumë më pak intensiv sesa nëse jeni i sëmurë klinikisht”, tha Hunter.
A ndikon te të moshuarit dhe fëmijët?
Fëmijët në mbi 12 vjeç dhe të rriturit deri në 85 vjeç u përfshinë në studim, por të dhënat për këtë nuk janë botuar ende.
“Shumica e vaksinave nuk funksionojnë aq mirë tek njerëzit e moshuar sa në të rinjtë. Nuk është për t’u habitur sepse të moshuarit nuk marrin gjithmonë një përgjigje imune efektive ndaj një infeksioni natyror. Nuk do të ishte për t’u habitur nëse të moshuarit nuk u përgjigjen aq efektivisht sa të rinjve ndaj kësaj vaksine. është diçka për të cilën duhet të presim të dhënat”, tha Hunter.
Pse nuk prek 10 përqind të pacientëve?
Eshtë e vështirë të thuash pse preku 90 përqind të pacientëve, dhe jo 10, pa ditur se kush janë ata, tha Dr. Stephen Griffin i Universitetit të Leeds.
“Vaksina do të funksionojë ndryshe tek njerëz të ndryshëm. Kështu që shpesh merrni norma të ndryshme përgjigjesh brenda popullatave – mund të jetë që të gjithë janë më të vjetër, ose ndoshta janë nga një sfond tjetër racor, ose mund të ndodhë që gjëja të funksionojë vetëm nëntë herë nga 10″, shtoi Dr. Griffin.
Sa zgjat mbrojtja?
Një normë efikasiteti prej 90 përqind u llogarit shtatë ditë pas vaksinimit të dytë, por këto rezultate ka të ngjarë të ndryshojnë pasi të dhënat mblidhen për një periudhë më të gjatë.
“Në përgjithësi, për të përcaktuar se sa zgjat mbrojtja, do të nevojiten studime shtesë për të zbuluar shkallët e të dy llojeve të përgjigjes imune, si dhe rreziqet e ekspozimit të përsëritur,” tha Kampmann.
