Pasditen e djeshme para miqësores me Greqinë, Federata e Futbollit të Zvicrës njoftoi se Granit Xhaka është infektuar më Covid-19 dhe është veçuar menjëherë nga skuadra përpara ndeshjes me fqinjët tanë.
Kapiteni kishte shfaqur simptoma në mëngjes dhe pasi kreu një test të shpejtë, doli negativ. Mjekët e udhëzuan të bëjë edhe testin PCR dhe aty ai rezultoi pozitiv me virusin e rrezi*kshëm.
Sot, presidenti i Federatës së Zvicrës, Adrian Arnold, ka bërë me dije se Granit Xhaka ishte mes lojtarëve, që nuk kishin pranuar të merrnin dozat e rekomanduara të vaksinës.
“Xhaka kishte zgjedhur të mos vaksinohej. Ishte vendim personal i tij, ashtu si çdo njeri tjetër në Zvicër. Është e drejta e tij të mos pranojë.
Të gjithë lojtarët e tjerë në ekip janë vaksinuar, ose e kanë kaluar së fundmi virusin, kështu që mund të themi se janë të mbrojtur nga pikëpamja mjekësore.
Nga pikëpamja sportive është turp dhe e dhimbshme që kapiteni u infektua në një moment kaq të rëndësishëm për të ardhmen në eliminatore”, u shpreh Arnold. /abcnews.al
