Rio de Janeiro do të mbyllë plazhet e famshme të Copacabana-s dhe Ipanema-s për fundjavën, në mënyrë që të shtypë përhapjen e rritur të koronavirusit, njoftoi kryetari i bashkisë së Rios, Eduardo Paes.
Ai tha se situata në qytet ishte “shumë kritike” dhe u bëri thirrje qytetarëve të qëndrojnë në shtëpitë e tyre, si dhe ndaloi ardhjen e autobusëve në Rio de Janeiro për të parandaluar përhapjen e virusit, i cili pjesërisht i atribuohet variantit më ngjitës të Brazilit, sipas Daily Mail.
Plazhet u mbyllën fillimisht një vit më parë gjatë valës së parë të epidemisë në vend, megjithëse kjo nuk solli rezultatet e pritshme në atë kohë, sepse shpesh ishin të mbushura me njerëz.
Plazhet u rihapën në nëntor para fillimit të verës në hemisferën jugore.
Vendimi për t’u mbyllur u kritikua nga presidenti Jair Bolsonaro, i cili ishte i shqetësuar, siç tha ai, se banorët e atij qyteti do të merrnin shumë pak vitaminë D.
“Vitamina D është një mënyrë për të shmangur një formë të rëndë të sëmundjes,” tha ai dhe shtoi”: “Dhe si do ta merrni vitaminën D jo në diell?”
Paes paralajmëroi se më shumë kufizime do të ndiqnin të hënën pasi spitalet publike në Rio aktualisht kanë 95 përqind të okupimit në njësitë e kujdesit intensiv.
Pandemia është jashtë kontrollit në Brazil dhe brenda një muaji numri i vdekjeve është dyfishuar nga rreth një mijë në ditë mesatarisht në shkurt në mbi dy mijë këtë javë.
